З 1 сакавіка па 30 красавіка ў зале перыядычных выданняў (пам. 106) праходзіць тэматычная выстаўка “Беларусь-2009: значныя падзеі года”.
Мінулы год для Рэспублікі Беларусь адзначаны радам знакавых падзей, якія закранулі палітычнае, сацыяльна-эканамічнае і культурнае жыццё краіны. У экспазіцыі прадстаўлена падборка матэрыялаў з перыядычных выданняў, якія адлюстроўваюць многія важнейшыя падзеі года.
Шырокае асвятленне атрымала ў сродках масавай інфармацыі такая гістарычная, лёсавызначальная падзея, як стварэнне Беларуссю, Расіяй і Казахстанам Мытнага саюза. Гэтаму важнаму акту прысвечаны прадстаўленыя на выстаўцы артыкулы ў часопісах “Беларусь” (2009 г., № 12), “Беларуская думка” (2009 г., № 11), “Директор” (2009 г., № 11) і інш.
Адной са значных падзей для рэспублікі ў 2009 г. стаў перапіс насельніцтва. Падрабязную інфармацыю па гэтым пытанні наведвальнікі могуць знайсці ў прадстаўленых на выстаўцы перыядычных выданнях “Проблемы управления” (2009г., № 2), “Беларускі час” (2009 г., № 41), “Мінская праўда” (2009 г., № 151) і інш.
Багатым на падзеі і разнастайным было ў мінулым годзе і культурнае жыццё краіны. Публікацыі ў газетах “ Літаратура і мастацтва” (2009 г., № 47) і “7 дней” (2009 г., № 51) расказваюць пра Першы з’езд Саюза пісьменнікаў Саюзнай дзяржавы, на якім было аб’яўлена пра стварэнне аб’яднанай арганізацыі пісьменнікаў Беларусі і Расіі. Матэрыялы выстаўкі таксама нагадваюць пра візіт Патрыярха Маскоўскага і ўсяе Русі Кірыла ў Беларусь. Не менш значнымі культурнымі падзеямі года стала адкрыццё пасля рэстаўрацыі Нацыянальнага акадэмічнага Вялікага тэатра оперы і балета Рэспублікі Беларусь, правядзенне 38-га Міжнароднага конкурсу “Міс Інтэркантыненталь” у Мінску і інш.
Усяго на выстаўцы прадстаўлена каля 40 публікацый.
Кантактны тэлефон: 293-25-87.