З 8 па 20 жніўня 2009 года ў зале беларускай літаратуры (пам. 205) праходзіць юбілейная выстаўка "Архітэктура – справа яго жыцця", прысвечаная 70-годдзю беларускага архітэктара, вучонага-даследчыка архітэктуры, педагога Вячаслава Міхайлавіча Чарнатава.
Самабытны талент дойліда раскрыўся ў стварэнні нацыянальнага архітэктурна-будаўнічага аблічча Беларусі. Яго шматлікія праекты рэалізаваны ў індустрыяльным жыллёвым будаўніцтве і грамадскіх пабудовах, якія ўпрыгожваюць гарады і вёскі краіны. Архітэктар шмат часу аддаў справе рэгенерацыі, рэстаўрацыі і захавання культурна-гістарычнай спадчыны рэспублікі.
Вячаслаў Міхайлавіч як вучоны працуе над праблемай даследавання развіцця нацыянальнай канцэпцыі архітэктуры Беларусі ХХ ст. У кола яго навуковых інтарэсаў уваходзіць плеяда таленавітых беларускіх дойлідаў, якім ён прысвяціў свае кнігі, напісаныя грунтоўна, з выкарыстаннем архіўных дакументаў. Манаграфіі выйшлі ў аўтарскай серыі "Майстры каменнага летапісу". У гэтых выданнях даследчык падрабязна асвятляе жыццё і творчасць Г. Заборскага, А. Духана, С. Шабунеўскага, У. Караля.
На выставачных паліцах прадстаўлены кнігі "Памятники воинской славы на белорусской земле (ХІХ – нач. ХХ в.)" (1978), "Сынам Отчизны" (1980), "Битва под Лесной" (1982), "Памятники военной истории и боевой славы" (1983), "Георгий Заборский: каталог работ" (1993) і інш. Значнае месца ў экспазіцыі займаюць шматтомныя энцыклапедыі, даведачныя выданні, навуковыя зборнікі, галіновыя часопісы, у якіх змешчаны артыкулы В.М. Чарнатава.
Акрамя навуковых прац, на выстаўцы прадстаўлены праектныя работы аўтара.
Упрыгожваюць экспазіцыю асобныя малюнкі, зробленыя В.М. Чарнатавым у час шматлікіх даследчых вандровак па краіне і за яе межамі. Яны яскрава адлюстроўваюць светапогляд мастака і яго адносіны да гісторыка-архітэктурнай спадчыны.Частка графічных работ з’яўляецца мастацкай каштоўнасцю.
Больш за два дзесяцігоддзі дацэнт кафедры архітэктурнага факультэта БНТУ Вячаслаў Міхайлавіч Чарнатаў дзеліцца сваімі ведамі са студэнтамі, перадае ім багаты вопыт нацыянальнай беларускай архітэктурнай школы. Многія яго вучні паспяхова прадаўжаюць лепшыя традыцыі свойго настаўніка, мудрага чалавека і таленавітага педагога.
Творчыя пошукі і высокі прафесіяналізм В.М. Чарнатава адзначаны шматлікімі граматамі і дыпломамі міжнародных арганізацый, у тым ліку Міжнароднай асацыяцыі Саюза архітэктараў, Саюза архітэктараў СССР, Саюза архітэктараў Рэспублікі Беларусь.
Кантактны тэлефон: 293-27-16.
