З 5 па 28 лютага 2009 года ў Нацыянальнай бібліятэцы Беларусі (3 паверх, кальцавы калідор) праходзіць кніжная выстаўка “Акно ў Кітай”.
Нацыянальная бібліятэка Кітая пачала ажыццяўляць буйнамаштабную праграму “Акно ў Кітай” у адносінах Нацыянальнай бібліятэкі Беларусі пасля падпісання ў 2007 годзе Мемарандума аб ўзаемаразуменні паміж дзвюма бібліятэкамі, разлічанага на 2006-2010 гг.
На працягу 2008 года ў дар Нацыянальнай бібліятэцы Беларусі паступіла больш за 600 экземпляраў выданняў на англійскай і кітайскай мовах па філасофіі, юрыспрудэнцыі, гісторыі, культуры і мастацтве Кітая. Дастаткова поўна прадстаўлены кодэкс законаў Кітайскай Народнай Рэспублікі. Вялікі інтарэс прадстаўляюць серыйныя выданні. Так, напрыклад, серыя “Класічны кітайскі жывапіс у замежных калекцыях” складае 8 тамоў. Аосбна можна вылучыць маляўнічыя альбомы па мастацтве, а таксама выданні, у якіх прадстаўлены буйныя турыстычныя аб’екты краіны.
5 лютага 2009 года адбылася ўрачыстая цырымонія перадачы кніг у дар Нацыянальнай бібліятэцы Беларусі Пасольствам Кітайскай Народнай Рэспублікі ў асобе надзвычайнага і паўнамоцнага пасла КНР у Рэспубліцы Беларусь спадара Лу Гуйчэна. І гэта толькі невялікая частка культурнага абмену.
На тэматычнай выстаўцы “Акно ў Парыж” прадстаўлена частка падораных дакументаў: кнігі па культуры, эканоміцы, філасофіі і рэлігіі, палітыцы, вайсковай справе, гісторыі, праве, архітэктуры і горадабудаўніцтве, спорце, прыродных рэсурсах Кітая, часопісы і газеты, а таксама мастацкая літаратура (усяго больш за 100 экземпляраў).
Цеснае эканамічнае і палітычнае супрацоўніцтва паміж нашымі краінамі адлюстроўваецца ў павышанай цікавасці да пяцітысячагадовай гісторыі і культуры Кітая. Выданні, атрыманыя Нацыянальнай бібліятэкай Беларусі ў рамках праграмы “Акно ў Кітай”, пакладуць пачатак стварэння унікальнай кніжнай калекцыі Нацыянальнай бібліятэкі Беларусі пра Кітай, дапамогуць у вывучэнні кітайскай гісторыі, культуры, мастацтва, літаратуры, палітыкі і эканомікі.