З 18 красавіка па 7 ліпеня ў Нацыянальнай бібліятэцы Беларусі (3-ці паверх, кальцавы калідор) адкрыта выстаўка “Афрыка: гістарычная і культурная спадчына” да Міжнароднага года асоб афрыканскага паходжання.
18 снежня 2009 г. Генеральная Асамблея ААН абвясціла 2011 год Міжнародным годам асоб афрыканскага паходжання, акцэнтуючы ўвагу на неабходнасці ўмацавання нацыянальнага, рэгіянальнага і міжнароднага супрацоўніцтва ў мэтах надання асобам афрыканскага паходжання магчымасці ў поўнай меры карыстацца сваімі эканамічнымі, культурнымі, сацыяльнымі, грамадзянскімі і палітычнымі правамі. На працягу года ў розных краінах будзе праводзіцца шэраг мерапрыемстваў, накіраваных на павышэнне ўзроўню ўдзелу асоб афрыканскага паходжання ва ўсіх сферах жыцця грамадства, а таксама на пашырэнне ведаў пра іх разнастайную спадчыну і культуру і на павагу да іх.
Прапанаваная выстаўка "Афрыка: гістарычная і культурная спадчына" знаёміць са шматвяковай і рознабаковай гісторыяй і культурай Афрыкі. Асобныя раздзелы прысвечаны гістарычнаму развіццю, традыцыям і звычаям афрыканскага кантынента, прадстаўлены кнігі, якія апавядаюць аб праблемах, з якімі сутыкаюцца асобы афрыканскага паходжання.
Асаблівая ўвага адведзена мастацтву Афрыкі, якое ўключае розныя рэгіянальныя школы і ахоплівае некалькі гістарычных эпох. Тым не менш афрыканскае мастацтва ўяўляе сабой адзіны гістарычны тып і характарызуецца цэласнасцю стылістычных прыкмет.
Асобным блокам прадстаўлена літаратура, якая дазваляе акунуцца ў таямнічы свет Егіпта. Культура гэтай дзяржавы сыходзіць сваімі каранямі ў глыб тысячагоддзяў і спалучае ў сабе адзінства старажытнага свету і новых адкрыццяў. Легендарныя піраміды, даліна цароў, усыпальня Тутанхамона, Сфінкс, храм у Карнаку – усё гэта можна знайсці ў кнігах, прысвечаных гэтай дзіўнай краіне.
Афрыка з’яўляецца домам для незлічоных плямёнаў, этнічных і сацыяльных груп, якія ўяўляюць велізарныя папуляцыі, што складаюцца з мільёнаў людзей. Некаторыя краіны гэтага кантынента маюць больш за 20 розных этнічных аб’яднанняў.
Каля 200 мільёнаў чалавек, якія адносяць сябе да асоб афрыканскага паходжання, пражываюць у Амерыцы. Яшчэ мільёны пражываюць у іншых частках свету, за межамі афрыканскага кантынента. Абвяшчаючы гэты Міжнародны год, міжнародная супольнасць прызнае, што асобы афрыканскага паходжання ўяўляюць сабой адметную групу, правы якой неабходна заахвочваць і абараняць.
 |
 |
 |
 |
 |
 |
 |
 |
 |
 |
 |
 |
