З 9 чэрвеня па 28 ліпеня ў зале нотных і аўдыявізуальных дакументаў (пам. 305) праходзіць выстаўка “Ад вытокаў народных”, прысвечаная 75-годдзю беларускага кампазітара і педагога М.В. Сіраты.
Творчасць Мікалая Васільевіча Сіраты з’яўляецца яркім звяном ў ланцугу лепшых традыцый беларускага музычнага мастацтва. Яго ведаюць як аўтара шматлікіх арыгінальных п’ес: вакальных, харавых, інструментальных, апрацовак народных песень і танцаў, а таксама як выканаўцу-баяніста, аркестранта і ансамбліста.
Пры ўсёй разнастайнасці жанраў, форм яго сачыненняў ёсць у іх адна нязменная якасць: блізкасць да народных інтанацый, народнасць духу. На працягу творчай дзейнасці, беражліва захоўваючы самабытнасць, непаўторнасць і асаблівасць народнай песні, М.В. Сірата стварае для Нацыянальнага акадэмічнага народнага хору Рэспублікі Беларусь цыклавыя праграмы “Звонкія галасы Беларусі”, “З глыбінь жыватворных”, вакальна-харэаграфічныя кампазіцыі “Вясеннія абрады”, “Купальскія гульні”, “Каляды”, апрацоўкі беларускіх, рускіх і ўкраінскіх песень для хору, салістаў, ансамбляў і аркестраў. Новымі апрацоўкамі нацыянальнага фальклору папоўнены канцэртны рэпертуар ансамбляў “Ярыца”, “Крупіцкія музыкі”, “Церніца”, “Валачобнікі”, “Вярба” і інш. Вялікая колькасць твораў напісана для любімага інструмента – баяна.
Асноўную частку экспазіцыі складаюць нотныя выданні і аўдыядакументы з фондаў Нацыянальнай бібліятэкі. Наведвальнікі маюць магчымасць праслухаць аўдыязапісы твораў кампазітара ў выкананні народнага ансамбля “Радзімічы” (“Беларусь – песня мая”), Дзяржаўнага акадэмічнага народнага хору БССР імя Г.І. Цітовіча (“Вясёлая староначка”), аркестра народных інструментаў пад кіраўніцтвам М.У. Сіраты і іншых калектываў.
Высокі ўзровень выканальніцкай і педагагічнай кваліфікацыі Мікалая Васільевіча знайшоў адлюстраванне ў яго навукова-метадычных работах. Аўтарам апублікаваны вучэбна-метадычныя дапаможнікі і рэпертуарныя зборнікі, сярод якіх “І песню родную люблю я...” (2008), “Добрыя дзень вам, госці” (2007), “У вянок Максіму Багдановічу” (2006), “Асаблівасці нацыянальнага стылю ў сучаснай апрацоўцы беларускіх народных песень для баяна” (2006).
Дапаўняюць выстаўку публікацыі з перыядычных выданняў, прысвечаныя жыццю і творчасці юбіляра.
Кантактны тэлефон: (8 017) 293 27 52.
 |
 |
 |
 |
 |
 |
