З 12 па 31 снежня на кальцавым калідоры 3-га паверха праходзіць выстаўка “Абуджайце ў сабе цудоўнае”, прысвечаная 90-годдзю з дня нараджэння вядомага расійскага гісторыка і ўсходазнаўцы Л.В. Шапашнікавай.
Людміла Васільеўна Шапашнікава (1926–2015) – вядомы філосаф, выбітны даследчык творчасці сям’і Рэрыхаў, пісьменніца, вандроўца, грамадскі дзеяч. Яе велізарны ўклад у навуку і культуру адзначаны дзяржаўнымі ўзнагародамі – ордэнамі Дружбы (2006) і “За заслуги перед Отечеством” IV ступені (2011) за вялікі ўклад у развіццё музеязнаўства і захаванне культурнай спадчыны, а таксама ганаровымі званнямі і дыпломамі.
Асноўным дасягненнем Л.В. Шапашнікавай стала стварэнне ў Маскве грамадскага Музея імя М.К. Рэрыха. Апошнія 26 гадоў жыцця яна цалкам прысвяціла сябе яго развіццю, з’яўляючыся нязменным генеральным дырэктарам музея і першым віцэ-прэзідэнтам Міжнароднага цэнтра Рэрыхаў (МЦР). Дзякуючы яе падзвіжніцкай дзейнасці за 25 гадоў цэнтр стаў вядучым у свеце аб’яднаннем па захаванні, вывучэнні і папулярызацыі спадчыны Рэрыхаў.
Людміла Васільеўна – заснавальнік і прэзідэнт Дабрачыннага фонду імя А.І. Рэрых, галоўны рэдактар часопіса “Культура и время”, аўтар 35 кніг і звыш 500 артыкулаў, прысвечаных культуры Індыі, навукова-філасофскай, мастацкай спадчыне сям’і Рэрыхаў. Творчая спадчына Л.В. Шапашнікавай мае сусветнае значэнне і патрэбу ў папулярызацыі, глыбокім, усебаковым вывучэнні.
На кніжнай выстаўцы прадстаўлена больш за 120 выданняў – працы Л.В. Шапашнікавай, М.К. Рэрыха, пісьмы А.І. Рэрых, працы Ю.М. Рэрыха, С.М. Рэрыха, “Учение живой этики”, матэрыялы грамадска-навуковых канферэнцый, якія праходзілі ў МЦР, пісьмы П.Ф. Фларэнскага, публікацыі Аб’яднанага навуковага цэнтра праблем касмічнага мыслення (АНЦ КМ), маляўнічыя альбомы з карцінамі М.К. Рэрыха і сучасных рускіх мастакоў-касмістаў, часопісы “Культура и время”, зборнікі артыкулаў.
Кантактны тэлефон: (8 017) 293 28 86.
 |
 |
 |
 |
 |
 |
 |
 |
 |
 |
 |
