З 1 ліпеня па 31 жніўня ў зале нотных і аўдыёдакументаў (пам. 305) праходзіць выстаўка “Аўдыёкніга ў фондах Нацянальнай бібліятэкі Беларусі”.
Што такое аўдыёкніга? Літаральна гэта “кніга, што гучыць” або “кніга, прачытаная ўголас”. Аўдыёкнігі – гэта літаратура, але не ў тэкставым, а ў гукавым варыянце. Звычайна аўдыёкніга захоўваецца на CD або DVD-дысках і складаецца з дзесяткаў гукавых файлаў у фармаце MP3, начытаных прафесійнымі акцёрамі (радзей аўтарам). У сярэднім 300–350 старонак звычайнай кнігі можна супаставіць з 9–11 гадзінамі гучання аўдыёкнігі. Аўдыёкнігі – ідэальны варыянт для сляпых людзей і тых, хто дрэнна бачыць і не мае магчымасці чытаць, але хоча пагрузіцца ў чароўны і захапляльны свет літаратуры, працягнуць сваю адукацыю.
На выстаўцы прадстаўлена больш за 80 дакументаў. Гэта паэзія “срэбранага стагоддзя” – І. Бунін, М. Цвятаева, М. Гумілёў, Б. Пастарнак, У. Хадасевіч; паэзія Усходу – Саадзі, Фірдоусі, лірыка Саят-Новы; класіка рускай і замежнай літаратуры – Ф. Дастаеўскі, А. Чэхаў, М. Ляскоў, М. Гогаль (у выкананні вядомых артыстаў М. Ульянава і А. Пятрэнкі), У. Шэкспір, У. Моэм, Г. Мапасан, Б. Брэхт, А. Бальзак, Ф. Фіцджэральд, Д. Сэлінджэр і інш.; творы савецкіх пісьменнікаў – А. Рыбакоў “Дети Арбата”, М. Шолахаў “Тихий Дон”, Б. Васільеў “Завтра была война” і, безумоўна, беларуская літаратура – Я.Купала, Я. Колас, У. Арлоў, В. Іпатава. Прадстаўлены і аўдыёкнігі для дзяцей – казкі Х.К. Андэрсана, А. Ліндгрэн, беларускія народныя казкі.
Слухайце з асалодай.
Кантактны тэлефон: 293-27-52.