З 14 лютага па 10 сакавіка ў зале выяўленчых і відэадакументаў (пам. 307) праходзіць выстаўка “А душа цешыцца прастораю…”, прысвечаная 100-годдзю з дня нараджэння П.В. Масленікава.
Дзейнасць народнага мастака Беларусі, лаўрэата Дзяржаўнай прэміі Беларусі, тэатральнага мастака, жывапісца, мастацтвазнаўца і педагога Паўла Васільевіча Масленікава (1914–1995) была накіравана на стварэнне тэатральнай культуры, нацыянальнай сістэмы адукацыі і навукі ў галіне мастацтва, развіццё беларускага жывапісу. Яго імя знаходзіцца ў ліку прызнаных майстроў пейзажнага жывапісу і тэатральна-дэкарацыйнага мастацтва Беларусі XX ст.
П. Масленікаў належыць да першага пакалення беларускіх мастакоў-дэкаратараў савецкага часу. Ім аформлены шэраг опер, балетаў і драматычных пастановак у тэатрах рэспублікі. Прадстаўленыя на выстаўцы выданні расказваюць пра спектаклі, у пастаноўках якіх майстар прымаў удзел, знаёмяць з эскізамі дэкарацый.
Асаблівае месца на выстаўцы займаюць рэпрадукцыі карцін П. Масленікава, якія ўзнаўляюць блізкую яго сэрцу родную прыроду. Майстар не прапаноўвае незвычайных зрокавых вобразаў, толькі маляўнічыя далечы, мяккія лініі, нетаропкі рытм каларыстычных пераходаў.
Павел Васільевіч займаўся і мастацтвазнаўчымі даследаваннямі ў галіне сцэнаграфіі, жывапісу, тэорыі жанраў выяўленчага мастацтва, творчасці розных мастакоў. Ён з’яўляецца аўтарам манаграфіі “Беларускі савецкі тэматычны жывапіс” (1962), адным з аўтараў выдання “Гісторыя беларускага мастацтва” (т. 4–6, 1990–1994), аўтарам раздзела па мастацтве Беларусі для энцыклапедыі “История искусства народов СССР” (т. 8, 1977). Гэтыя працы знаходзяцца сярод экспанатаў выстаўкі.
Дапаўняюць экспазіцыю даведачны матэрыял, кнігі, прысвечаныя мастаку, публікацыі з перыядычных выданняў.
Імя Паўла Масленікава носіць Магілёўскі абласны мастацкі музей. Лёс большасці сваіх прац мастак вырашыў яшчэ пры жыцці – перадаў у дар музею каля 140 жывапісных палотнаў.
Кантактны тэлефон: (8 017) 293 27 53.