З 19 красавіка ў бібліятэцы арганізавана юбілейная выстаўка “30 гадоў Беларускаму фонду культуры”.
Беларускі фонд культуры – добраахвотная грамадская арганізацыя, створаная ў Мінску ў 1987 годзе на ўстаноўчай канферэнцыі Беларускага рэспубліканскага аддзялення Савецкага фонду культуры.
Сярод яго заснавальнікаў былі Міністэрства культуры, Міністэрства асветы, Міністэрства вышэйшай і сярэдняй спецыяльнай адукацыі, многія дзяржаўныя камітэты, усе творчыя беларускія саюзы, іншыя грамадскія арганізацыі. Савет Міністраў Беларускай ССР 12 мая 1988 года прыняў спецыяльную пастанову № 123 “О Белорусском республиканском отделении Советского фонда культуры”.
Пад кіраўніцтвам народнага пісьменніка Беларусі Івана Чыгрынава на працягу амаль 10 гадоў фонд з’яўляўся актыўнай у грамадскім жыцці арганізацыяй, аб’ядноўваючы нацыянальную інтэлігенцыю.
Фонд спрыяў стварэнню такіх арганізацый, як таварыства беларускай мовы, краязнаўчае таварыства, суполкі беларускіх народных майстроў, фалькларыстаў і іншых спецыялістаў, распрацаваў і ажыццяўляе доўгатэрміновую праграму “Спадчына”. Назва Беларускі фонд культуры (БФК) была атрымана ў 1992 годзе. Цяпер арганізацыю ўзначальвае Уладзімір Гілеп, які таксама з’яўляецца галоўным рэдактарам “Краязнаўчай газеты”.
На выстаўцы адлюстравана выдавецкая дзейнасць фонду – мастацкая, краязнаўчая і біяграфічная літаратура, перыядычныя выданні і інш.
Гістарычны інтарэс прадстаўляюць першыя выданні часопіса “Спадчына” і “Краязнаўчай газеты”, “Статут Савецкага фонду культуры”, а таксама шэраг малавядомых дакументаў аб дзейнасці БФК, прадастаўленых Нацыянальным архівам Рэспублікі Беларусь.
Беларускім фондам культуры сумесна з Нацыянальнай бібліятэкай і шэрагам устаноў краіны падрыхтавана серыя зборнікаў “Вяртанне”, у якіх змяшчаюцца дакументы і архіўныя матэрыялы па праблемах пошуку і вяртання нацыянальных каштоўнасцей, што знаходзяцца за межамі рэспублікі. Акрамя архіўных дакументаў, карцін, абразоў, у спіс каштоўнасцей уключаны цэлыя бібліятэкі, часткі фондаў, камплекты беларускіх перыядычных выданняў, рукапісныя фонды беларускіх пісьменнікаў і паэтаў, асобныя старажытныя кнігі і рукапісы.
Наведвальнікі выстаўкі могуць убачыць выданні Беларускага фонду культуры, што атрымалі найвышэйшыя ўзнагароды нацыянальнага конкурсу “Мастацтва кнігі” – паэмы Адама Міцкевіча “Пан Тадэвуш” (1998) на польскай, беларускай і рускай мовах, “Яўгеній Анегін” Аляксандра Пушкіна (1999) на рускай і беларускай мовах, “Новая зямля” Якуба Коласа (2002) на беларускай, польскай і рускай мовах, а таксама аповесць Уладзіміра Караткевіча “Дзікае паляванне караля Стаха” (2010) на беларускай, рускай, украінскай і англійскай мовах і шматмоўныя выданні вершаў Максіма Багдановіча “Слуцкія ткачыхі”, “Раманс”, “Пагоня” (2011) з ілюстрацыямі да іх А. Кашкурэвіча, В. Шаранговіча, Ю. Якавенкі, Ю. Хілько.
З 20 красавіка выстаўка працуе на 2-м паверсе кальцавога калідора.