26 мая ў музеі кнігі адбылося ўрачыстае адкрыццё выставы “100 рарытэтаў: ад гістарычных кнігазбораў да сучасных арт-кніг”, прысвечанай гісторыі фарміравання фонду Нацыянальнай бібліятэкі Беларусі. У экспазіцыі – найбольш значныя і каштоўныя ўзоры беларускай і сусветнай кніжнай спадчыны, назапашаныя за 100 гадоў.
З прывітальным словам выступіла генеральны дырэктар Нацыянальнай бібліятэкі Беларусі Аксана Кніжнікава. Яна адзначыла, што дзякуючы пераезду ў новы будынак установа стала буйным сацыякультурным цэнтрам, і ўсё ж першачарговая задача галоўнай скарбніцы ведаў – сабраць, захаваць і перадаць кніжную спадчыну нашчадкам. Таму адным з важных праектаў з’яўляецца выстава, прысвечаная 100-гадовай гісторыі фарміравання бібліятэчнага фонду.
Дырэктар Нацыянальнага гістарычнага музея Рэспублікі Беларусь Аляксандр Храмы выказаў задавальненне ад таго, што на адкрыцці выставы, прысвечанай 100-годдзю Нацыянальнай бібліятэкі Беларусі, сабраліся прадстаўнікі розных устаноў культуры, якія таксама назапашваюць веды пра кнігу, пісьменнікаў, літаратуру, а таксама з прыемнасцю адзначыў, што фонды Нацыянальнага гістарычнага музея знаходзяцца ў адным будынку з бібліятэкай, што дае магчымасць ладзіць разам выставы і мерапрыемствы.
Дырэктар Нацыянальнага архіва Рэспублікі Беларусь Андрэй Дземянюк заўважыў, што бібліятэка сустракае юбілей добрымі поспехамі. Архіў і бібліятэка супрацоўнічаюць многія гады, зроблена шмат сумесных праектаў. Напрыканцы свайго выступлення Андрэй Канстанцінавіч адзначыў прафесіяналізм калектыву бібліятэкі.
Даследчык і калекцыянер, лаўрэат прэміі Прэзідэнта Рэспублікі Беларусь “За духоўнае адраджэнне”, мецэнат Нацыянальнай бібліятэкі Уладзімір Ліхадзедаў павіншаваў установу з надыходзячым юбілеем і расказаў пра добрыя адносіны з супрацоўнікамі бібліятэкі, з якімі правялі не адзін дзясятак сумесных выстаў.
Завяршылася мерапрыемства заключным словам і экскурсіяй па выставе галоўнага бібліёграфа навукова-даследчага аддзела кнігазнаўства Нацыянальнай бібліятэкі Беларусі Галіны Кірэевай, якая адзначыла, што выстава з’яўляецца своеасаблівым падвядзеннем вынікаў 100-гадовай працы не аднаго пакалення бібліятэкараў, што кожная кніга фонду звязана з пэўным чалавекам, а бібліятэка – гэта не толькі кнігі, але і людзі.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Выстава будзе працаваць да 31 снежня 2022 г.
Дата яе заканчэння можа быць зменена.
Тэлефоны для даведак: (8 017) 293 27 81, 293 27 22.
Матэрыял пададзены навукова-даследчым аддзелам кнігазнаўства.
