З 26 красавіка па 10 чэрвеня ў Нацыянальнай бібліятэцы Беларусі (2-гі паверх, кальцавы калідор) ладзіцца тэматычная кніжная выстаўка да Дня Вялікай Перамогі “...И помнит мир спасенный”.
Праходзяць дзесяцігоддзі, змяняюцца пакаленні, але Перамога народа ў Вялікай Айчыннай вайне 1941–1945 гг. навечна застанецца ў гераічным летапісе Беларусі як сімвал нацыянальнага гонару, воінскай славы і доблесці.
Вялікай Перамозе Нацыянальная бібліятэка Беларусі прысвячае тэматычную кніжную выстаўку. У экспазіцыі прадстаўлена каля 200 кніг, выдадзеных за апошнія гады, якія расказваюць пра гераізм, мужнасць і стойкасць савецкіх людзей у гады Вялікай Айчыннай вайны. Сярод іх кнігі – пераможцы рэспубліканскага конкурсу “Мастацтва кнігі”. 800-старонкавы фаліянт “Энциклопедия Победы. Беларусь – Москва” выдавецтва “Беларуская Энцыклапедыя імя Петруся Броўкі”. Выданне змяшчае абагульняльныя гістарычныя нарысы пра пачатковы этап Вялікай Айчыннай вайны, пра партызанскі і падпольны рух на тэрыторыі Беларусі, а таксама пра асноўныя этапы вызвалення беларускай зямлі ад акупантаў. Акрамя таго, энцыклапедыя ўтрымоўвае звесткі пра Герояў Савецкага Саюза, якія ўдзельнічалі ў вызваленні Беларусі, а таксама пра выхадцаў Беларусі, удастоеных звання Героя Савецкага Саюза. Кніга “Никогда не забудем”, што выйшла ў выдавецтве “Мастацкая літаратура”, нікога не пакіне раўнадушным. Гэта сучаснае перавыданне зборніка, які ўпершыню ўбачыў свет у 1948 годзе і перавыдаваўся 12 разоў, з унікальнай кантраснай падборкай фатаграфій шчаслівых дзяцей мірнага часу і “дзяцей вайны”, з аповедамі іх аднагодкаў – відавочцаў страшных злачынстваў фашыстаў.
Класіка ваеннай прозы прадстаўлена на выстаўцы серыяй “Великая Отечественная” маскоўскага выдавецтва “Терра – Книжный клуб”. Серыя апавядае пра ўнікальныя чалавечыя лёсы, невядомыя або малавядомыя ваенныя падзеі, інтэрнацыянальны характар подзвігаў, якія здзяйсняліся ў імя Перамогі. Галоўны сэнс твораў – святая памяць пра тых, хто заваяваў права на неўміручасць самай дарагой цаной – цаной жыцця.
У раздзеле “Каб памяць не перарывалася” сабраны друкаваныя выданні пра мясціны баявой славы і народнай трагедыі, музеі Вялікай Айчыннай вайны, помнікі і абеліскі, а таксама мультымедыйныя выданні з ваеннымі фільмамі і песнямі.
Гэта выстаўка – даніна павагі і шчырая падзяка за вялікі подзвіг ветэранам, якія вызвалілі свет ад фашызму.
Кантактны тэлефон: (8 017) 293 28 86.