Летась мы адзначылі 120-годдзе з дня нараджэння выдатнага паэта, крытыка і перакладчыка Язэпа Пушчы (1902–1964), да юбілею якога Нацыянальная бібліятэка стварыла віртуальную экспазіцыю ў межах праекта “На хвалі часу, у плыні жыцця”. Праект працягваецца і папаўняецца новымі матэрыяламі. Сёння, 20 мая, у дзень нараджэння пісьменніка знаёмім вас з чарговымі навінкамі.
У лютым 2023 года Нацыянальная бібліятэка прыняла ўдзел у пасяджэнні круглага стала “Захаванне і папулярызацыя гістарычнай памяці. Пісьменнікі-землякі: Язэп Пушча”, які прайшоў у рамках абласнога праекта “Пісьменнікі – ураджэнцы роднага краю” ў Гатаўскай сельскай бібліятэцы-клубе (аг. Гатава Мінскага раёна). Падчас мерапрыемства калегі з Мінскай раённай цэнтральнай бібліятэкі падарылі ўдзельнікам круглага стала падрыхтаваную да юбілею пісьменніка друкаваную прадукцыю: кніжную закладку, а таксама інфармацыйна-бібліяграфічны паказальнік “Язэп Пушча: станаўленне творчай індывідуальнасці” (2022), куды ўвайшлі біяграфічныя матэрыялы, копіі фотаздымкаў і рукапісаў пісьменніка, спісы яго кніг.
Бібліятэкары той жа ўстановы выпусцілі яшчэ адно выданне – рэкамендацыйна-бібліяграфічны паказальнік “Літаратурнымі сцежкамі Язэпа Пушчы” (2023), якое дапоўнілі аналітычным разборам яго вершаў і паэм, спісамі крытычных матэрыялаў пра паэта.
У гонар Язэпа Пушчы Гатаўская сельская бібліятэка-клуб таксама падрыхтавала інфармацыйную прадукцыю пра свайго земляка: буклет з кароткай біяграфіяй паэта і кішэнны каляндар. Сваімі друкаванымі навінкамі калегі падзяліліся з Нацыянальнай бібліятэкай.
Сёлета выданні папоўнілі фонды “алмаза ведаў”, былі алічбаваны і далучаны ў віртуальны раздзел пра Язэпа Пушчу ў рамках праекта “На хвалі часу, у плыні жыцця”.
Запрашаем да знаёмства з новымі матэрыяламі, з якіх можна больш даведацца пра паэта, аднаго з заснавальнікаў і актыўных удзельнікаў згуртавання “Маладняк”.
Матэрыял падрыхтаваны галоўным бібліёграфам інфармацыйна-аналітычнага аддзела Юліяй Амосавай.
