Завершаны прыём заявак на ўдзел у анлайн-конкурсе чытальнікаў “О, Беларусь, мая шыпшына”.
З 1 кастрычніка да 15 лістапада ў межах віртуальнага праекта “На хвалі часу, у плыні жыцця” праходзіў анлайн-конкурс чытальнікаў, прымеркаваны да 120-годдзя Уладзіміра Дубоўкі. Арганізатарам выступіла Нацыянальная бібліятэка Беларусі сумесна з інфармацыйнымі партнёрамі – часопісамі “Маладосць” і “Бярозка”.
Конкурс набыў неверагодную папулярнасць. Мы атрымалі больш за 700 творчых прац ад удзельнікаў рознага ўзросту, з усіх абласцей Беларусі, а таксама з Італіі. Адзначым, што большасць работ высокага мастацкага ўзроўню. Нас вельмі цешыць такая высокая цікавасць да творчасці беларускага пісьменніка.
У сувязі з велізарнай колькасцю работ, дасланых на конкурс, падвядзенне вынікаў і абвяшчэнне пераможцаў перанесена на 1 снежня.
Акрамя таго, аргкамітэт конкурса вырашыў павялічыць колькасць прызавых месцаў, падзяліўшы працы ў катэгорыі “Школьнікі і навучэнцы да 18 гадоў” на падкатэгорыі: 6–9 гадоў, 10–13 гадоў, 14–18 гадоў. Катэгорыя “Дарослыя ад 18 г.” застаецца нязменнай.
Азнаёміцца з конкурснымі працамі, а таксама пакінуць свой голас за ўпадабаныя відэачытанні можна ў суполцы “О, Беларусь, мая шыпшына!”.
Матэрыял пададзены інфармацыйна-аналітычным аддзелам.
