25 мая Нацыянальная бібліятэка Беларусі прыняла ўдзел у ХХІІІ Узвышаўскіх чытаннях, якія прайшлі ў Беларускім дзяржаўным архіве-музеі літаратуры і мастацтва.
Сёлета чытанні былі прысвечаны 100-годдзю літаратурнага аб’яднання “Маладняк”. Згуртаванне адыграла вялікую ролю ў развіцці беларускай савецкай літаратуры, праводзіла выхаваўчую працу сярод моладзі, садзейнічала выяўленню талентаў, ажыццяўляла кнігаабмен з іншымі краінамі. З “Маладняка” выйшлі вядомыя пісьменнікі і паэты – Уладзімір Дубоўка, Кузьма Чорны, Змітрок Бядуля, Міхась Зарэцкі, Паўлюк Трус, Міхась Чарот, Ян Скрыган, Язэп Пушча, Пятрусь Броўка, Пятро Глебка і многія іншыя.
У штогадовай канферэнцыі ўзялі ўдзел літаратуразнаўцы, гісторыкі, архівісты, супрацоўнікі бібліятэк і музеяў, выкладчыкі ўніверсітэтаў, даследчыкі творчасці маладнякоўцаў. На мерапрыемстве ўздымаліся пытанні ўшанавання памяці пісьменнікаў літаб’яднання, іх літаратурная, выдавецкая і грамадская дзейнасць, асобы і лёсы ўдзельнікаў згуртавання праз іх архіўныя дакументы, праблемы мастацкага перакладу, выдання творчай спадчыны. Прыемным момантам сталі “літаратурныя прышчэпкі” – цукеркі з фрагментамі вершаў Паўлюка Труса, прапанаваныя Аксанай Драчан, дырэктарам Уздзенскай цэнтральнай раённай бібліятэкі імя П. Труса.
Аксана Драчан прапаноўвае “літаратурныя прышчэпкі”
Да 100-годдзя літаб’яднання ўжо пяты год Нацыянальная бібліятэка вядзе маштабны праект “На хвалі часу, у плыні жыцця”, у якім можна пазнаёміцца з 11 віртуальнымі экспазіцыямі, прысвечанымі ўдзельнікам згуртавання. Зараз рыхтуецца 12-ты раздзел, прымеркаваны да 115-годдзя з дня нараджэння таленавітай паэткі і перакладчыцы Яўгеніі Пфляўмбаўм (1908–1996). Пра яе жыццё і лёс, каштоўныя дакументы маладнякоўкі з фондаў архіва-музея, якія паступова будуць размешчаны ў праекце і стануць даступны карыстальнікам, распавяла Юлія Амосава, галоўны бібліёграф інфармацыйна-аналітычнага аддзела НББ.
Падчас мерапрыемства была прадстаўлена выстаўка “Кніжніца «Маладняк»”, на якой экспанаваліся выданні маладнякоўцаў 1920-х гадоў з фондаў архіва-музея. Таксама да 115-годдзя з дня нараджэння пісьменніцы і перакладчыцы Ядвігі Бяганскай (1908–1992) можна было пазнаёміцца з экспанатамі выстаўкі “Жыцця майго пожня”.
Нагадваем, што ў фондах Нацыянальнай бібліятэкі Беларусі захоўваюцца зборнікі матэрыялаў чытанняў “Пра час «Узвышша»”, а таксама матэрыялы альманаха “Аўтограф”, у трох выпусках якога можна азнаёміцца з тэкстамі дакладаў мінулых гадоў.
Дзякуем Беларускаму дзяржаўнаму архіву-музею літаратуры і мастацтва за арганізацыю канферэнцыі і шматгадовую падтрымку праекта “На хвалі часу, у плыні жыцця”!
Матэрыял падрыхтаваны Юліяй Амосавай, галоўным бібліёграфам інфармацыйна-аналітычнага аддзела.
