26 мая ў Беларускім дзяржаўным архіве-музеі гісторыі літаратуры і мастацтва прайшлі чарговыя ХХІ Узвышаўскія чытанні, дзе была адзначана праца сумеснага праекта “На хвалі часу, у плыні жыцця”, у якім архіў-музей удзельнічае разам з Нацыянальнай бібліятэкай Беларусі.
Прывітальным словам канферэнцыяю адкрыла дырэктар архіва-музея Ганна Запартыка, зазначыўшы важнасць традыцыйнай сустрэчы даследчыкаў. Яна прэзентавала другі выпуск зборніка “Аўтограф” (2021). Першае яго выданне з’явілася ў мінулым годзе, сабраўшы выступленні даследчыкаў на канферэнцыях апошніх гадоў. Намеснік дырэктара дэпартамента па архівах і справаводстве Міністэрства юстыцыі Рэспублікі Беларусь Аляксей Цвяткоў таксама адзначыў неабходнасць правядзення такіх сустрэч і акрэсліў іх далейшыя перспектывы.
На канферэнцыі выступіла загадчыца інфармацыйна-аналітычнага аддзела Нацыянальнай бібліятэкі Беларусі Таццяна Лаўрык, якая ў сваім выступленні “Постаці «маладнякоўцаў» на старонках віртуальнага праекта «На хвалі часу, у плыні жыцця»: Кузьма Чорны, Уладзімір Дубоўка, Ян Скрыган і Змітрок Бядуля” расказала пра сумесную працу бібліятэкі і партнёраў над праектам. Асаблівы акцэнт быў зроблены на віртуальныя раздзелы найбольш выбітных аўтараў і на выкарыстаныя пры іх стварэнні матэрыялы архіва-музея.
Таксама на мерапрыемстве прайшла прэм’ера прома-роліка пра віртуальны праект і працу над ім Нацыянальнай бібліятэкі Беларусі, Дзяржаўнага музея гісторыі беларускай літаратуры, Беларускага дзяржаўнага архіва-музея літаратуры і мастацтва і часопіса “Маладосць”. Прапануем вашай увазе гэта відэа. У хуткім часе мы раскажам пра яго больш падрабязна.
На канферэнцыі выступілі супрацоўнікі архіва – вядучы супрацоўнік Віктар Жыбуль з дакладам пра юбіляра гэтага года Змітрака Бядулю, намеснік дырэктара Наталля Гардзіенка з інфармацыяй пра Антона Адамовіча. Прагучалі цікавыя выступленні пра ўдзельнікаў аб’яднанняў “Маладняк” і “Узвышша” кандыдата філалагічных навук Аксаны Данільчык, дактаранта Цэнтра даследаванняў беларускай культуры, мовы и літаратуры НАН Беларусі Жанны Шаладонавай, загадчыка філіяла Дзяржаўнага музея гісторыі беларускай літаратуры “Літаратурны музей Максіма Багдановіча” Міхаіла Бараноўскага і навуковага супрацоўніка Цэнтра даследаванняў беларускай культуры, мовы і літаратуры НАН Беларусі Валерыя Назарава.
У завяршэнне канферэнцыі Віктар Жыбуль правёў экскурсію па выстаўцы “З сусветам тады пагаворыш…”, падрыхтаванай да 95-годдзя аб’яднання “Узвышша”.
Матэрыял пададзены інфармацыйна-аналітычным аддзелам.
