Нацыянальная бібліятэка Беларусі стала адным з арганізатараў конкурсу буктрэйлераў – кароткіх відэаролікаў, прысвечаных пэўнай кнізе. Сярод задач конкурсу – стварэнне калекцыі такіх відэа для далейшай перадачы ў бібліятэчную сістэму рэспублікі. У спецыяльнай рубрыцы нашага партала можна пазнаёміцца з матэрыяламі, створанымі маладымі для маладых.
Народны пісьменнік Беларусі Іван Шамякін прысвяціў тэме вайны шэраг твораў. Ён прайшоў Вялікую Айчынную, удзельнічаў у баях, таму нядзіўна, што яго творчасць працята гуманізмам. Такі пасыл можна ўбачыць і ў цыкле аповесцей “Трывожнае шчасце”.
Гэта шырокае мастацкае палатно, якое праз гісторыю Пятра Шапятовіча і Сашы Траянавай распавядае пра лёс цэлага пакалення. Тут знайшлося месца і лірызму першага кахання, і тэмам змагання з ворагам на акупіраванай тэрыторыі, франтавых будняў, вернасці закаханых, а таксама пасляваеннага аднаўлення і нават супрацьстаяння рэжыму.
Аднаго з канкурсантаў зацікавіла першая аповесць з пенталогіі Шамякіна. Буктрэйлер атрымаўся арыгінальным – яго аўтар зняў ролік, выкарыстоўваючы гульню асвятлення і спецыяльна зробленыя фігуркі. Атрымалася вельмі тэатральна, падобна на беларускую батлейку.
Творчыя знаходкі, нестандартнасць бачання і манеры выкладу гісторыі, несумненна, не могуць не прывабіць увагу патэнцыйнага чытача.
Матэрыял падрыхтаваны аддзелам суправаджэння інтэрнэт-партала.