Чытачы Нацыянальнай бібліятэкі маюць магчымасць дыстанцыйна атрымаць доступ да ліцэнзійных электронных рэсурсаў вядучых выдавецтваў па розных галінах ведаў. Гэта істотна дапаможа ў аддаленай адукацыйнай і навуковай дзейнасці.
Вялікі выбар адукацыйных рэсурсаў па прыродазнаўчых і тэхнічных дысцыплінах змяшчаецца ў электронна-бібліятэчнай сістэме (ЭБС) “Znanium”: у аддаленым рэжыме магчымы доступ да больш за 7 тыс. поўных тэкстаў манаграфій, навуковых артыкулаў, падручнікаў, энцыклапедый, даведнікаў выдавецтваў “ИНФРА-М”, “РИОР”, “Вузовский учебник”, “Энциклопедия”, “Альфа-М”, “Форум”, “Магистр”, “Интеллект” і многіх іншых. Гэта электронныя выданні для студэнтаў, магістрантаў, аспірантаў, выкладчыкаў і прафесараў.
Тэматычныя электронныя калекцыі кніг “Навукі пра Зямлю”, “Прамысловая экалогія і біятэхналогіі”, “Фізіка і астраномія”, “Нанатэхналогіі і матэрыялы”, “Ядзерная энергетыка і тэхналогіі”, “Інфарматыка і вылічальная тэхніка” даступны ў ЭБС “БиблиоРоссика”. У іх уключаны электронныя версіі выданняў Сібірскага аддзялення Расійскай акадэміі навук, Маскоўскага дзяржаўнага ўніверсітэта, рэгіянальных устаноў вышэйшай адукацыі, выдавецтваў “Лаборатория знаний”, “Феникс”, “Альпина Паблишер” і іншых.
Анлайн-версіі выпускаў “Весніка Маскоўскага ўніверсітэта” па матэматыцы і механіцы, вылічальнай матэматыцы і кібернетыцы, хіміі, біялогіі прадстаўлены на электроннай платформе “East View”.
Каб працаваць з поўнымі тэкстамі электронных выданняў дома, неабходна зарэгістравацца на электронных платформах. Зрабіць гэта вам дапамогуць невялікія інструкцыі:
- Як зарэгістравацца ў ЭБС “Znanium”
- Як зарэгістравацца ў ЭБС “БиблиоРоссика”
- Як зарэгістравацца ў БД “East View”
Інфармацыя аб ліцэнзійных электронных рэсурсах і магчымасцях выдаленай працы з імі, рэсурсах адкрытага доступу, а таксама рэсурсах, якія ствараюцца Нацыянальнай бібліятэкай, даступна ў раздзеле "Электронныя інфармацыйныя рэсурсы".
Зычым плённай вучобы і працы!
Матэрыял пададзены аддзелам карпаратыўнага ўзаемадзеяння.