Чытачы Нацыянальнай бібліятэкі маюць магчымасць дыстанцыйна атрымаць доступ да ліцэнзійных электронных рэсурсаў вядучых выдавецтваў па розных галінах ведаў. Гэта істотна дапаможа ў аддаленай адукацыйнай і навуковай дзейнасці.
Навуковая перыёдыка па гуманітарных і грамадскіх навуках даступна на платформе аднаго з найбуйнейшых агрэгатараў інфармацыйных рэсурсаў “East View”. Гэта калекцыі “Выданні па грамадскіх і гуманітарных навуках”, “Часопісы Расіі па пытаннях педагогікі і адукацыі”, “Веснікі Маскоўскага дзяржаўнага ўніверсітэта”, газеты краін СНД і Балтыі, а таксама калекцыя біяграфій, мемуараў і крытыкі “Essential Russian Classics”. Нашым калегам-бібліятэкарам, студэнтам і магістрантам будзе цікавай падборка перыёдыкі “Бібліятэчная справа і інфармацыйнае абслугоўванне”.
Вучэбная і навуковая літаратура па грамадскіх і гуманітарных навуках прадстаўлена на электроннай платформе “БиблиоРоссика”: поўныя тэксты кніг выдавецтваў “Наука”, “Флинта”, “Весь мир”, інстытутаў Расійскай акадэміі навук, Вышэйшай школы эканомікі, Маскоўскага педагагічнага дзяржаўнага ўніверсітэта, Томскага дзяржаўнага ўніверсітэта і інш.
Манаграфіі і навуковыя часопісы па мовазнаўстве, псіхалогіі, мастацтвазнаўстве, музыцы прапануе электронна-бібліятэчная сістэма расійскага выдавецтва і агрэгатара электронных інфармацыйных рэсурсаў “Лань”.
Навуковыя часопісы з пераліку Вышэйшай атэстацыйнай камісіі Расійскай Федэрацыі і шэраг перыядычных выданняў па архітэктуры, гісторыі, сацыялогіі, філасофіі і іншых дысцыплінах даступны ў электронна-бібліятэчнай сістэме “Znanium”. Тут жа – вучэбная літаратура выдавецтва "Вузовский учебник", часопісы, вучэбная і мастацкая літаратура выдавецтва "Инфра-М".
Каб працаваць з поўнымі тэкстамі электронных выданняў дома, неабходна зарэгістравацца на электронных платформах. Зрабіць гэта вам дапамогуць невялікія інструкцыі:
- Як зарэгістравацца ў БД “East View”
- Як зарэгістравацца ў ЭБС “БиблиоРоссика”
- Як зарэгістравацца ў ЭБС “Лань”
- Як зарэгістравацца ў ЭБС “Znanium”
Інфармацыя аб ліцэнзійных электронных рэсурсах і магчымасцях выдаленай працы з імі, рэсурсах адкрытага доступу, а таксама рэсурсах, якія ствараюцца Нацыянальнай бібліятэкай, даступна ў раздзеле "Электронныя інфармацыйныя рэсурсы".
Зычым плённай вучобы і працы!
Матэрыял прадастаўлены аддзелам карпаратыўнага ўзаемадзеяння.
