Аддаючы даніну памяці ўдзельнікам Вялікай Айчыннай вайны і загінулым, віртуальная чытальная зала Нацыянальнай бібліятэкі Беларусі працягвае знаёміць карыстальнікаў з краязнаўчымі рэсурсамі публічных бібліятэк, прысвечанымі гэтай тэме. На гэты раз прадстаўляем “Дзяржыншчыну гераічную” – электронны рэсурс Дзяржынскай раённай цэнтралізаванай бібліятэчнай сістэмы.
Старонкі гераічнай абароны, партызанскага і падпольнага руху, вызвалення Дзяржынскага раёна Мінскай вобласці, горкія сведчанні людзей пра жыццё ў акупацыі, спаленых вёсках – усё гэта адлюстравана ў рэсурсе “Дзяржыншчына гераічная”. Асобныя яго раздзелы распавядаюць пра ўраджэнцаў гэтых месцаў: падлеткаў – членаў партызанскіх атрадаў, дыверсійных і падпольных груп; Герояў Савецкага Саюза, камандзіраў і салдатаў, якія абаранялі Ленінград і Сталінград, вызвалялі Севастопаль і Барысаў, бралі Кёнігсберг, гарады Бельгіі і Прагу.
Фактаграфічная інфармацыя па кожнай тэме суправаджаецца бібліяграфічным спісам.
Віртуальная чытальная зала запрашае карыстальнікаў перайсці на гэты электронны рэсурс на старонцы ВЧЗ “Рэсурсы арганізацый – партнёраў Нацыянальнай бібліятэкі Беларусі” і ў падраздзеле вэб-сайта “Беларусь у інфармацыйнай прасторы” “Краязнаўчыя рэсурсы публічных бібліятэк”.
Матэрыял прадастаўлены аддзелам карпаратыўнага ўзаемадзеяння.