“Электронны музей А.М. Карпюка” – такі новы праект Цэнтралізаванай бібліятэчнай сістэмы г. Гродна папаўніў калекцыю віртуальных музеяў, прысвечаных людзям, якія праславілі гэты край.
“Як быць найбольш карысным людзям”, – пад такім дэвізам жыў і ствараў Алякспей Карпюк (1920–1992), пісьменнік, удзельнік партызанскага руху і баявых дзеянняў падчас Вялікай Айчыннай вайны, грамадскі дзеяч, заслужаны дзеяч культуры і лаўрэат літаратурнай прэміі імя І. Мележа Саюза пісьменнікаў БССР (1986).
Інфармацыйны рэсурс “Электронны музей А.М. Карпюка” знаёміць наведвальнікаў з біяграфіяй пісьменніка, успамінамі пра яго, аглядамі і рэцэнзіямі на яго творы, поўнай бібліяграфіяй публікацый і кніг аўтара і публікацый, прысвечаных яго асобе і творчасці. Рэсурс багата ілюстраваны, а таксама мае асобны падраздзел – “Галерэя”, дзе сабраны фатаграфіі, аўдыё- і відэаматэрыялы.
Спасылка на электронны музей даступная на старонцы віртуальнай чытальнай залы “Рэсурсы арганізацый-партнёраў Нацыянальнай бібліятэкі Беларусі” (“Гродненская вобласць”) і ў падраздзеле сайта “Беларусь у інфармацыйнай прасторы” “Краязнаўчыя рэсурсы публічных бібліятэк”.
Матэрыял прадастаўлены аддзелам карпаратыўнага ўзаемадзеяння.
Чытайце таксама: Да 100-годдзя з дня нараджэння Аляксея Карпюка Нацыянальная бібліятэка Беларусі падрыхтавала выстаўку "З глыбінь перажытага".