Нацыянальная бібліятэка Беларусі працягвае адкрываць анлайн свае фонды. Напярэдадні Дня Незалежнасці Рэспублікі Беларусь паўнатэкставая электронная калекцыя “Беларуская літаратурная спадчына. Часопісы 1919–1939 гг.” папоўнілася новымі выданнямі.
Віртуальны рэсурс змяшчае 270 найменняў беларускіх перыядычных выданняў і выданняў з працягам, якія выходзілі на тэрыторыі БССР і Заходняй Беларусі з 1919 па 1939 гг. Гэта больш за 4 тыс. нумароў.
Як выглядаў Дом урада і Цэнтральны Дом селяніна ў Мінску? Дзе і калі з'явіўся першы дзяржаўны рыбаводны завод БССР? Якое надвор'е было ў беларускіх гарадах? Адказы на гэтыя пытанні можна знайсці ў часопісах рэсурсу. У калекцыі таксама прадстаўлены матэрыялы аб ліквідацыі непісьменнасці ў беларускіх губернях, побыце рабочых і сялян, працы прафсаюзаў і іншых праблемах міжваеннага перыяду, вывучаючы якія можна зразумець, што хвалявала беларускае грамадства 100 гадоў таму.
Больш за 2 500 рэдкіх і старадрукаваных дакументаў НББ даступны анлайн
Праект будзе цікавы даследчыкам у галіне гісторыі, педагогікі, эканомікі, медыцыны, супрацоўнікам бібліятэк, архіваў, музеяў, а таксама ўсім, хто цікавіцца гісторыяй і культурай Беларусі.
Матэрыял пададзены цэнтрам алічбавання і забеспячэння захаванасці бібліятэчных дакументаў.
Чытайце таксама анлайн-праекты Нацыянальнай бібліятэкі па старонках беларускай перыёдыкі:
- “100 дзён да Вялікай Перамогі. Па старонках беларускіх газет 1945 г.”
- “Сведкі эпохі: Беларусь на старонках газет 100-гадовай даўніны”