Лічбавыя копіі рэдкіх і старадрукаваных дакументаў, якія захоўваюцца ў Нацыянальнай бібліятэцы Беларусі, можна чытаць аддалена.
Для пошуку і прагляду выданняў скарыстайцеся электронным каталогам на партале бібліятэкі. Дакументы, якія маюць лічбавую копію, адзначаны спасылкай “E-дакумент”. Для паскарэння загрузкі шматстаронкавыя дакументы разбіты на часткі.
Сярод іх прадстаўлены выданні Францыска Скарыны, Лаўрэнція Зізанія, Сімяона Полацкага, Пятра Мсціслаўца. Значную частку складаюць кніжныя зборы XVI–XVII стагоддзяў, выдадзеныя ў Вільні, Супраслі, Гродне, Кіеве.
Карыстальнікі маюць магчымасць убачыць унікальныя кнігі вядомых беларускіх аўтараў – Максіма Гарэцкага, Алаізы Пашкевіч, Якуба Коласа, Янкі Купалы, надрукаваныя ў пачатку ХХ стагоддзя. Сярод іх значнае месца займае зборнік паэзіі “Вянок”, асаблівая каштоўнасць якога – у дароўным надпісы, зробленым рукой Максіма Багдановіча.
Жадаем вам плённай працы!
Матэрыял прадастаўлены аддзелам фарміравання электроннай бібліятэкі.