Дзмітрый Вітальевіч нарадзіўся ў 1963 годзе ў Мінску. З адзнакай скончыў Расійскую акадэмію музыкі імя Гнесіных па спецыяльнасці “музыказнаўства” (клас праф. І.Я. Рыжкіна) і Беларускую дзяржаўную акадэмію музыкі па класе кампазіцыі ў праф. Д.Б. Смольскага. Прайшоў стажыроўку ў Пецярбургскай кансерваторыі імя М.А. Рымскага-Корсакава і Варшаўскай акадэміі музыкі імя Ф. Шапэна.
У творчасці Дзмітрый Лыбін сумяшчае традыцыйныя і авангардныя метады кампазіцыі. Ён аўтар твораў для сімфанічнага, камернага, духавога і народнага аркестраў. У рэпертуары кампазітара – творы для розных інструментальных саставаў, сольных інструментаў, вакальныя і харавыя цыклы.
З 2020 года з рукапісамі нот Дзмітрыя Лыбіна можна пазнаёміцца анлайн у электронным рэсурсе “Рукапісы сучасных кампазітараў з фондаў Нацыянальнай бібліятэкі Беларусі”. Тут размешчаны аркестравыя творы аўтара – “Восхождение к Моцарту”, “Postscriptum”, “Из Кракова в Вену”; творы для розных інструментаў – “Лики созвездий” (сюіта для скрыпкі, альта, віяланчэлі і фартэпіяна), “Семь маленьких фантазий на тему Глинки” (для флейты, гітары і струннага квартэта); “Старинная сюита” (для флейты і клавесіна). У анлайн-калекцыі таксама прадстаўлены ноты твораў кампазітара, звязаных з літаратурай і вобразамі прыроды: вакальны цыкл на вершы Роберта Бёрнса, Уільяма Шэкспіра і Джорджа Гордана Байрана ў перакладзе Самуіла Маршака – “Из английской и шотландской поэзии”, а таксама “Шесть стихотворений А. Пушкина”, “Отражения солнца в воде” і іншыя творы, правы на выкарыстанне якіх аўтар перадаў Нацыянальнай бібліятэцы Беларусі.
Электронны рэсурс “Рукапісы сучасных кампазітараў з фондаў Нацыянальнай бібліятэкі Беларусі” скіраваны на папулярызацыю беларускай музычнай культуры ў краіне і за яе межамі. Калекцыя ўвесь час папаўняецца. Плануецца, што да канца 2020 года яна складзе больш за 600 твораў 98 беларускіх аўтараў, якія заключылі аўтарскія пагадненні з Нацыянальнай бібліятэкай Беларусі. Рэсурс будзе карысны гісторыкам, музыказнаўцам, выкладчыкам і студэнтам музычных устаноў, навучэнцам музычных школ і ўсім, хто цікавіцца беларускай музыкай на сучасным этапе.
Аўтар публікацыі: В. Пшыбытка, цэнтр алічбоўкі і забеспячэння захаванасці бібліятэчных дакументаў.
