25 сакавіка а 18-й гадзіне ў галерэі “Лабірынт” заслужаная артыстка Рэспублікі Беларусь Алена Сало прадставіць монаспектакль “Сто слоў пра каханне”.

Народны артыст Беларусі, кампазітар Леанід Захлеўны і паэт Леанід Пранчак стварылі гэты цыкл спецыяльна для Алены Сало. У гэты вечар знакамітыя аўтары будуць у зале.

“Рада, што публіка зможа ўбачыць цудоўных аўтараў і зможа з імі пагутарыць, – кажа спявачка. – Кожны канцэрт, які мы дарым публіцы, павінен быць незвычайным і запамінальным. Гэты вечар, упэўнена, запомніцца гледачам… Выконваючы гэтыя цудоўныя рамансы, не перастаю дзівіцца глыбіні паэтычнага слова, разнастайнасці музычнай палітры, хоць, здаецца, аб каханні напісана, праспявана, знята, пастаўлена велізарная колькасць твораў…”.

Сапраўды, усе адценні і нюансы любоўнага пачуцця – ад бясхмарнага шчасця да глыбокай драмы, усе перажыванні тонкай і ранімай жаночай душы выяўлены ў змястоўнай музыцы і паэтычным тэксце. Дададзім, што Алена Сало стане вядучай канцэрта, а таксама выступіць у ролі… чытальніка: артыстка прачытае любімыя вершы Л. Пранчака.

За раялем – Анастасія Вензелева, малады канцэртмайстар Вялікага тэатра.

Запрашаем стаць часткай гэтага музычна-паэтычнага свята!

Мы ў Instagram.

Уваход – па чытацкім білеце.
Колькасць месцаў абмежаваная.

Папярэдні запіс пачнецца 20 сакавіка а 10-й гадзіне па тэлефоне: (8 017) 293 27 52.

Матэрыял пададзены аддзелам абслугоўвання спецыялізаванымі фондамі.