Дата правядзення
Час правядзення
Месца правядзення
31 снежня 2024 года Аляксандр Лукашэнка падпісаў указы № 483 “Аб прысуджэнні прэміі Прэзідэнта Рэспублікі Беларусь «За духоўнае адраджэнне»”, № 484 «Аб прысуджэнні спецыяльнай прэміі Прэзідэнта Рэспублікі Беларусь дзеячам культуры i мастацтва” і № 485 “Аб прысуджэнні спецыяльнай прэміі Прэзідэнта Рэспублікі Беларусь «Беларускі спартыўны Алімп»”. З гэтай нагоды ў бібліятэцы працуе кніжна-ілюстрацыйная выстаўка “Вялікі талент, вялікая работа, вялікае сэрца”, прысвечаная лаўрэатам вышэйадзначаных прэмій.
Дадзеныя прэміі Прэзідэнта Рэспублікі Беларусь прысуджаюцца штогод за лепшыя творы мастацкай літаратуры і мастацтва, актыўную дзейнасць у гуманітарнай сферы, якая садзейнічае захаванню і прымнажэнню нацыянальнага культурнага здабытку, выхаванню ў моладзі любві да Айчыны, сцвярджэнню духоўных каштоўнасцей і мастацка-маральных традыцый, ідэй чалавекалюбства, дабрачыннасці і міласэрнасці.
Па выніках 2024 года Глава дзяржавы ўручыў прэміі “За духоўнае адраджэнне” калектыву Мінскага навукова-практычнага цэнтра хірургіі, транспланталогіі і гематалогіі, калектыву Беларускага дзяржаўнага ўніверсітэта культуры і мастацтваў і протаіерэю Алегу Кунцэвічу, настаяцелю прыхода храма Узнясення Крыжа Гасподняга ў Мінску.
Спецыяльнай прэміі Прэзідэнта Рэспублікі Беларусь дзеячам культуры i мастацтва былі ўдастоены калектывы Маладзёжнага тэатра эстрады, Гомельскага дзіцячага сацыяльнага пансіяната “Шчаслівыя ўсмешкі”, Мінскага дзяржаўнага каледжа мастацтваў, Мінскага дзяржаўнага палаца дзяцей і моладзі, а таксама Магілёўская абласная арганізацыя БРСМ, тэлерадыёкампанія “Магілёў” і Магілёўскі абласны краязнаўчы музей імя Е.Р. Раманава.
За значны ўклад у захаванне і папулярызацыю традыцыйных рамёстваў, а менавіта за адраджэнне народных тэхналогій саломапляцення прэмію атрымала майстар Гродзенскага раённага культурна-інфармацыйнага цэнтра Ірына Шавельская. Загадчыца аддзела традыцыйнай культуры Віцебскага абласнога метадычнага цэнтра народнай творчасці Таццяна Лапкова была ўдастоена прэміі за асабісты ўклад у захаванне і папулярызацыю тэхналогіі аплятання бяростай ганчарнага посуду. Наведвальнікі пазнаёмяцца з працамі метадычнага цэнтра народнай творчасці, якія будуць экспанавацца на выстаўцы.
Не засталіся незаўважанымі дасягненні беларускіх спартсменаў. Яны адзначаны прэміяй Прэзідэнта Рэспублікі Беларусь “Беларускі спартыўны Алімп”. Сярод узнагароджаных – заслужаны трэнер Беларусі, старшы трэнер нацыянальнай каманды па інваспорце РЦАП па паралімпійскіх і дэфлімпійскіх відах спорту Генадзь Вішнякоў, заслужаны майстар спорту Беларусі па вольнай барацьбе Ірына Курачкіна, калектыў Віцебскай спецыялізаванай дзіцяча-юнацкай школы алімпійскага рэзерву № 1.
У экспазіцыі прадстаўлены кнігі, каталогі, буклеты, артыкулы з перыядычных выданняў, выяўленчыя дакументы – матэрыялы з фондаў бібліятэкі пра ўсіх лаўрэатаў 2024 года, якія высокай духоўнасцю і плённай працай славяць родную Беларусь.
Выстаўка працуе з 28 студзеня па 30 красавіка ў кальцавой галерэі 2-га паверха.
Тэрмін экспанавання можа быць зменены.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 29 80.
Матэрыял пададзены аддзелам галерэйна-выставачнай дзейнасці.