Праект арганізаваны пры ўдзеле школы фатаграфіі “Анёл” аддзялення сацыяльнай рэабілітацыі, абілітацыі інвалідаў дзяржаўнай установы “Тэрытарыяльны цэнтр сацыяльнага абслугоўвання насельніцтва Савецкага раёна г. Мінска”.

Яго мэта – прыцягнуць увагу да праблемы інваліднасці і жыцця з абмежаванымі магчымасцямі, дзейнасці цэнтра і фоташколы. Куратар – кіраўнік школы фатаграфіі “Анёл”, сябра Беларускага грамадскага аб’яднання фатографаў, педагог, інвалід-калясачнік Эдуард Клуйша.

Выстава “Павер у сябе” – вынік працы Дар’і Філіповіч за цэлы год, адлюстраванне яе ўнутранага свету, асаблівага погляду на навакольны свет, таленту, імкненняў і мар.

На фотаздымках – вуліцы Мінска, архітэктурныя панарамы, кампазіцыі садавіны, кветак, пейзажныя фотазамалёўкі, сілуэты і партрэты знаёмых, усмешкі і задуменныя погляды. Аўтар эксперыментуе з лініяй гарызонту, небам, святлом, ценямі, адлюстраваннем, вадой і шклом, сіметрыяй, балансам і глыбінёй здымка.

Работы працяты энтузіязмам, пазітыўным успрыманнем жыцця, радасцю ад магчымасці тварыць і дзяліцца, быць і любіць.

Падобныя праекты падтрымліваюць такіх аўтараў, як Дар’я Філіповіч, дзяцей, маладых і дарослых людзей з інваліднасцю на шляху іх творчай рэалізацыі, сацыялізацыі ў грамадстве, транслююць актыўную жыццёвую пазіцыю, вучаць верыць у сябе і сваё шчасце.