8 верасня знамянальны юбілей адзначыць доктар юрыдычных навук, выбітны правазнаўца, заслужаны юрыст Беларусі Васіль Фёдаравіч Чыгір – удзельнік Вялікай Айчыннай вайны, які атрымаў цяжкае раненне, удзельнік парада партызан у Мінску, узнагароджаны ордэнамі Айчыннай вайны 1-й і 2-й ступені, шматлікімі медалямі.

Восенню 1945 года Васіль Чыгір стаў паспяховым студэнтам Мінскага юрыдычнага інстытута і назаўжды звязаў сваё жыццё з юрыспрудэнцыяй. Яго імя асацыюецца ў многіх пакаленняў юрыстаў з беспярэчным аўтарытэтам у сферы цывілістыкі, велізарным выкладчыцкім стажам і вопытам кіруючай работы на юрыдычным факультэце БДУ. На кафедры грамадзянскага права БДУ ён стварыў навуковую школу па жыллёвым праве. Падрыхтаваў больш за 20 кандыдатаў і аднаго доктара навук.

Аўтар больш за 550 публікацый, у іх ліку 20 кніг, напісаных індывідуальна. Яго працы ахопліваюць ключавую праблематыку і многія інстытуты і падгаліны грамадзянскага права: прававое становішча фізічных і юрыдычных асоб, інтэлектуальная ўласнасць, жыллёвае і дагаворнае права, здзелкі, іскавая даўнасць і іншыя рэчавыя правы.

Васіль Чыгір удзельнічаў у падрыхтоўцы Грамадзянскага кодэкса БССР 1964 г. і Грамадзянскага кодэкса Рэспублікі Беларусь 1998 г., Жыллёвага кодэкса і іншых нарматыўных прававых актаў. Знаходзіўся ў складзе Канстытуцыйнай камісіі па падрыхтоўцы праекта Канстытуцыі Рэспублікі Беларусь, прынятай у 1994 г. З’яўляючыся членам навукова-кансультатыўных саветаў пры Вярхоўным судзе і Вышэйшым гаспадарчым судзе Рэспублікі Беларусь, аказваў дапамогу правапрымяняльным органам.

Узнагароджаны Ганаровай граматай Вярхоўнага Савета БССР, ордэнам Працоўнага Чырвонага Сцяга, яму прысвоена ганаровае званне заслужанага юрыста БССР. Акрамя таго, Васіль Чыгір – лаўрэат вышэйшай юрыдычнай прэміі “Феміда”. Гэта далёка не поўны пералік яго дасягненняў.

З юбілеем вас, паважаны Васіль Фёдаравіч!
Добрага вам здароўя, дабрабыту і моцы духу!

З 2 верасня па 28 кастрычніка ў зале прававой інфармацыі (пам. 207b) адкрыта тэматычная выстава “Чыгір Васіль Фёдаравіч”, прысвечаная яго 100-годдзю.

Экспазіцыя ўключае наступныя тэматычныя раздзелы:

Бібліяграфія публікацый доктара юрыдычных навук В.Ф. Чыгіра:
- манаграфіі, выданні, падрыхтаваныя ў сааўтарстве;
- падручнікі, навучальныя дапаможнікі і навучальныя матэрыялы;
- артыкулы ў часопісах;
- артыкулы ў зборніках навуковых прац, дакладаў і тэзісаў канферэнцый.
Матэрыялы па біяграфіі і літаратурнай спадчыне В.Ф. Чыгіра.

Выстава налічвае больш за 60 дакументаў. Гэта кнігі, перыядычныя выданні, аўтарэферат дысертацыі. Разлічана на шырокае кола чытачоў, якія цікавяцца жыццём і дзейнасцю прадстаўнікоў айчыннай юрыдычнай навукі.

Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Тэлефон для даведак: (8 017) 293 27 28.

Матэрыял пададзены аддзелам абслугоўвання афіцыйнымі дакументамі.