Танцавальныя калектывы з розных гарадоў Беларусі збяруцца ў гэты дзень разам, каб прадставіць маштабную танцавальную праграму. Мінскі “Dancing time”, гомельскі “Сярэбраны век”, магілёўскі “Серпанцін”, бабруйскі “Паланэз” – на першы баль у бібліятэцы завітае каля 100 падрыхтаваных танцораў. Да праграмы далучацца і іншыя танцавальныя калектывы краіны. На шматлікіх майстар-класах зацікаўленыя госці таксама змогуць засвоіць танцы і на некалькі гадзін пагрузіцца ў атмасферу балю.

Бібліятэчныя залы ў гэты дзень будуць адчынены для ўсіх жадаючых. Зала беларускай літаратуры (пам. 205) прапануе майстэрню рэстаўратара. У зале нотных і аўдыявізуальных дакументаў (пам. 305) можна будзе паслухаць гучанне вінілавых пласцінак праз навушнікі. Зала дакументаў па мастацтве (пам.306) прадставіць экскурсію па кніжна-ілюстрацыйнай выстаўцы “Жывапісец танцоўшчыц”, прысвечанай Эдгару Дэга. Застацца сам-насам з унікальнай і рэдкай кнігай, напоўніцца яе хараством і атмасферай можна будзе ў музеі кнігі.

У галерэі “Лабірынт” (пам. 345) будзе працаваць музычна-літаратурная гасцёўня. Вядома ж свята не абыдзецца і без “Гульнявога бальнага салона”, дзе можна будзе правесці час за традыцыйнымі шашкамі, шахматамі і паўдзельнічаць у дэтэктыўных гульнях “Шэрлак Холмс” і “Знікненне на французскім прыдворным балі XVIII стагоддзя”.