Тэматычная выстава “Свет без войнаў і насілля!”, прысвечаная Міжнароднаму дню міру, адкрыта з 14 верасня па 10 кастрычніка ў аддзеле абслугоўвання афіцыйнымі дакументамі (пам. 207).

Міжнародны дзень міру быў заснаваны Генеральнай асамблеяй ААН (рэзалюцыя A/RES/36/67) у 1981 годзе і штогод адзначаўся ў трэці аўторак верасня – дзень адкрыцця чарговых сесій асамблеі. Праз дваццаць гадоў, у 2001 годзе, Генеральная асамблея аднагалосна прыняла рэзалюцыю A/RES/55/282, у якой пастанавіла, што з 2002 года Міжнародны дзень міру будзе адзначацца штогод 21 верасня.

Прапанаваная выстава налічвае каля 100 дакументаў на рускай, англійскай і нямецкай мовах. Гэта кнігі, брашуры, мімеаграфаваныя матэрыялы ААН, перыядычныя выданні, буклеты.

Экспазіцыя пазнаёміць чытачоў і карыстальнікаў бібліятэкі з шматграннай дзейнасцю ААН і іншых міжнародных арганізацый у галіне падтрымання міру і міжнароднай бяспекі.

Сярод прадстаўленых на выставе экспанатаў – міжнародныя прававыя дакументы, энцыклапедыі і даведнікі, манаграфіі, матэрыялы даследаванняў па праблемах вайны і міру, палітыка-прававыя даследаванні па мерах умацавання даверу і бяспекі, матэрыялы навукова-практычных канферэнцый, круглых сталоў, навуковыя даклады, навучальныя дапаможнікі.

Большую частку экспазіцыі складаюць дакументы міжнародных арганізацый – даклады і агляды ААН, такія як даклад спецкамітэта ААН па падтрыманні міру, даклады генеральнага сакратара па парадку дня для міру і прадухілення канфліктаў, кароткі гістарычны агляд “ААН і раззбраенне” і інш.

Выстава ўключае наступныя тэматычныя раздзелы:

Мір і мірнае суіснаванне. Міжнародныя пагадненні і міжнародна-прававыя дакументы па падтрыманні міру
Раззбраенне, ядзернае раззбраенне
Аперацыі па падтрыманні міру, міратворчасць і мірабудаўніцтва
Барацьба з тэрарызмам і ядзерным тэрарызмам
Прадухіленне ўзброеных канфліктаў
Культура міру

Экспазіцыя будзе цікавая спецыялістам у галіне сусветнай палітыкі, дыпламатыі, міжнародных адносін, міжнароднага права, канфлікталогіі, а таксама студэнтам, магістрантам, палітычным і грамадскім дзеячам і ўсім, каму дарагі мір на Зямлі.

Мір – гэта адна з надзённых патрэб чалавецтва, якая вызначае найважнейшую місію ААН і аб’ядноўвае яе працу па ўсёй планеце: ад міратворчасці і прэвентыўнай дыпламатыі да падтрымання праў чалавека і развіцця.

Заснаваўшы гэты Дзень, ААН прысвяціла яго азнаменаванню і ўмацаванню ідэалаў міру як унутры дзяржаў і народаў, так і паміж імі. Асамблея заявіла, што Міжнародны дзень міру будзе адзначацца як дзень глабальнага спынення агню і адмовы ад насілля і прапанавала ўсім дзяржавам і народам выконваць спыненне ваенных дзеянняў на працягу гэтага дня.

Кожны год Дзень міру прысвячаецца пэўнай тэме. Тэма 2023 года – “Дзеянні ў імя міру: наша імкненне дасягнуць #ГлобальныеЦели”. Гэта заклік да дзеяння, які падкрэслівае нашу асабістую і калектыўную адказнасць за ўмацаванне міру. Умацаванне міру спрыяе рэалізацыі Мэт у галіне ўстойлівага развіцця (МУР), а іх дасягненне фарміруе культуру міру для ўсіх.

Карысныя спасылкі