Запрашаем на выставу “Бацькаўшчына. У пошуках страчанага”

15 верасня да Дня бібліятэк Нацыянальная бібліятэка і вядомы беларускі калекцыянер, мецэнат і грамадскі дзеяч, лаўрэат прэміі Прэзідэнта Рэспублікі Беларусь “За духоўнае адраджэнне” Уладзімір Ліхадзедаў адкрываюць у музеі кнігі выставу “Бацькаўшчына. У пошуках страчанага”.

Шырокай грамадскасці прадстаўлена ўнікальная магчымасць пабачыць сапраўдны скарб – асобнікі з бібліятэчнага фонду У. Ліхадзедава. Калекцыя ўключае каштоўныя рукапісы, старадрукі, рэдкія кнігі і перыёдыку XVI–XX ст., набытыя пры падтрымцы дзяржавы, перададзеныя ў дар і на дэпазітарнае захоўванне бібліятэцы.

Сярод іх каштоўны і знакавы помнік культуры – прывілей караля Рэчы Паспалітай Мінскаму ўніяцкаму манастыру (1617); рукапісныя рэгістрацыйныя кнігі культавых устаноў XVІІI–ХІХ стст.; хамаіл – рукапіс беларускіх татар; славянскія і еўрапейскія старадрукі XVІІI ст. Дэманструюцца экзэмпляры адной з першых беларускіх газет ХІХ ст. “Гродненские губернские ведомости”, выданні, прысвечаныя перыяду напалеонаўскіх войнаў, дакументы перыяду Першай сусветнай і Вялікай Айчыннай войнаў і інш.

Выстава арганізавана напярэдадні 20-годдзя гісторыка-асветніцкага праекта “Бацькаўшчына. У пошуках страчанага”.

Супраца калекцыянера і Нацыянальнай бібліятэкі скіравана на пошук, выяўленне, вяртанне і захаванне дакументальнай спадчыны Беларусі ў дзяржаўных зборах; навуковае даследаванне помнікаў айчыннай кніжна-пісьмовай культуры; папулярызацыю дакументальнай спадчыны ў нацыянальнай сістэме культуры, адукацыі і выхавання.

Экспазіцыя будзе адкрыта для наведвання да 15 кастрычніка 2023 г.
Дата яе завяршэння можа быць зменена.

Тэлефоны для даведак: (8 017) 293 27 81, 293 27 22.

Матэрыял пададзены навукова-даследчым аддзелам кнігазнаўства.