Дата правядзення
Час правядзення
21 красавіка Нацыянальная бібліятэка Беларусі запрашае на акцыю ў падтрымку чытання “Бібліяноч-2023”!
Тэма акцыі сёлета – “БібліяІмпульс”. “Алмаз ведаў” адпраўляе жыхарам і гасцям сталіцы сігнал: будзьце ў гэты вечар з намі, зараджайцеся ведамі і добрым настроем! З 19.00 да 23.00 бібліятэка будзе адкрыта для ўсіх жадаючых, уваход вольны!
Свята пачнецца ў холе бібліятэкі – мімы пазнаёмяць з праграмай вечара, а яркае тэатралізаванае адкрыццё дасць старт самай доўгачаканай бібліяакцыі. Гасцей чакаюць 22 тэматычныя пляцоўкі з насычанай праграмай на любы ўзрост і густ.
Для тых, хто збіраецца прыйсці вялікай кампаніяй, – актыўны квэст па пошуку таямнічых скарбаў “Унутры ромбакубаактаэдра”, гістарычнае падарожжа ў “Сярэбраны век”, настолкі, гісторыі пра “ўяўляльнікаў” ад стваральнікаў праекта “Фантастычнае падарожжа”, майстар-класы па індыйскім танцы і сучасных бальных танцах.
Для аматараў музыкі Нацыянальная бібліятэка падрыхтавала канцэрт-лекцыю класічнай музыкі “Музычны салон XIX стагоддзя”, выступленне хору кітайскіх студэнтаў БДПУ, канцэртную праграму “А ў сэрцы маладосць спявае”.
Жадаючых кінуць выклік сабе і ўсім запрашаем на шахматна-шашачныя турніры, майстар-класы па гульні ў японскія шахматы “сёгі” і кітайскія шахматы “сянцы”.
Маленькіх гасцей Бібліяночы пацешаць аквагрым, майстар-класы, тэатральныя пастаноўкі і пазнавальная IT-праграма ад вучэбнага цэнтра “Айціландыя”.
Для тых, хто хоча заўсёды пазнаваць нешта новае, у праграме – лекцыі адваката, астрапсіхолага, астролага, нутрыцыёлага, імідж-стыліста, “Літаратурны салон” з пісьменніцай Ірынай Карнавухавай, чайны рытуал “Тры кубкі тэксту” і многае іншае!
Уваход на бонусныя пляцоўкі – выставачны комплекс (пам. 104), галерэя “Панарама” (22-гі паверх), аглядная пляцоўка (23-ці паверх) – платны ці па фішках. Фішкі можна атрымаць за актыўны ўдзел на пляцоўках.
Сардэчна запрашаем! Мы адкрытыя для ўсіх, хто гатовы да новых культурных уражанняў, неабыякавы да чытання і імкнецца да ведаў!
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.