Беларусь і ЮНІСЕФ – партнёрства дзеля дзяцей

З 18 студзеня па 28 лютага ў зале дакументаў міжнародных арганізацый (пам. 207g) адкрыта тэматычная выстава “Беларусь і ЮНІСЕФ – партнёрства дзеля дзяцей”, прысвечаная 70-годдзю ўступлення Рэспублікі Беларусь у ЮНІСЕФ.

У экспазіцыі – каля 70 дакументаў на рускай і англійскай мовах: кнігі, брашуры, мімеаграфаваныя матэрыялы ААН, перыядычныя выданні, буклеты. Дакументы адлюстроўваюць дзейнасць Дзіцячага фонду Арганізацыі Аб’яднаных Нацый (ЮНІСЕФ), накіраваную на абарону здароўя і жыцця дзяцей, іх фізічнае і інтэлектуальнае развіццё.

Прадстаўленыя на выставе матэрыялы знаёмяць з гісторыяй стварэння ЮНІСЕФ, яго структурай і асноўнымі напрамкамі дзейнасці, а таксама з глабальнымі і нацыянальнымі праграмамі і праектамі, якія ЮНІСЕФ рэалізуе ў Беларусі.

Большую частку экспазіцыі складаюць дакументы арганізацыі – справаздачы аб дзейнасці, даклады выканаўчага савета ЮНІСЕФ, нацыянальныя даклады аб становішчы дзяцей у Рэспубліцы Беларусь, агляды і ацэнкі становішча дзяцей у свеце і інш.

Сярод прадстаўленых экспанатаў – зборнікі міжнародна-прававых дакументаў і нацыянальных заканадаўчых актаў па пытаннях абароны праў дзяцей, манаграфіі, практычныя дапаможнікі, матэрыялы навукова-практычных канферэнцый.

Экспазіцыя складаецца з наступных раздзелаў:

• Нацыянальныя і міжнародныя прававыя дакументы па абароне праў дзіцяці
• ЮНІСЕФ: гісторыя і сучаснасць
• Дзейнасць ЮНІСЕФ у Беларусі

Выстава прызначана для педагогаў, юрыстаў, сацыёлагаў, работнікаў сферы адукацыі, аховы здароўя і культуры, а таксама для ўсіх, хто не абыякавы да будучыні нашых дзяцей.

Дзіцячы фонд Арганізацыі Аб’яднаных Нацый (ЮНІСЕФ) быў створаны ў 1946 годзе па рашэнні Генеральнай асамблеі ААН для дапамогі дзецям, пацярпелым у Другой сусветнай вайне. З 1953 года арганізацыя ўваходзіць у сістэму ААН як спецыялізаваная ўстанова, дзейнасць якой прысвечана абароне і падтрымцы праў дзяцей усяго свету на бяспечнае, здаровае і шчаслівае дзяцінства.

Беларусь з’яўляецца членам арганізацыі з 1953 года. У 1997-м у Мінску было адкрыта прадстаўніцтва ЮНІСЕФ у Рэспубліцы Беларусь. Наша краіна чатыры разы станавілася членам выканаўчага савета ЮНІСЕФ – кіруючага органа арганізацыі. За гады працы ў Беларусі фонд зарабіў рэпутацыю надзейнага і адказнага партнёра. Супрацоўніцтва з ЮНІСЕФ уносіць уклад у ажыццяўленне нацыянальных планаў і праграм у сферы паляпшэння становішча дзяцей у Беларусі з акцэнтам на найбольш уразлівыя катэгорыі, прафілактыкі шкодных звычак, ВІЧ/СНІДа сярод дзяцей і моладзі, заахвочвання і абароны праў дзіцяці.

Узаемадзеянне з фондам ажыццяўляецца на аснове краінавай праграмы для Беларусі на 2021–2025 гады з агульным бюджэтам амаль 15 млн долараў ЗША. Штогод пачынаючы з 1 чэрвеня 2017 года, у Дзень абароны дзяцей, у Мінску праводзіцца ўнікальнае для Беларусі па фармаце сумеснае мерапрыемства МЗС і прадстаўніцтва ЮНІСЕФ “Партнёрства дзеля дзяцей”. У ім бяруць удзел нацыянальныя партнёры фонду, дыпкорпус, прадстаўнікі міжнародных і грамадскіх арганізацый, СМІ, дзеці падшэфных МЗС школ, выхаванцы дзіцячых дамоў.

Карысныя спасылкі

• Сайт ЮНІСЕФ
• UNICEF Executive Board
• Child protection
• Children uprooted
• Children with disabilities
• Gender equality
• Early childhood development
• The State of the World’s Children
• Annual Report
• Прадстаўніцтва ЮНІСЕФ у Рэспубліцы Беларусь

Тэлефон для даведак: (8 017) 293 27 34.