Інфармацыйная бяспека ў структуры права

З 16 студзеня да 26 сакавіка ў зале прававой інфармацыі (пам. 207b) арганізавана выстава “Інфармацыйная бяспека ў структуры права”, прысвечаная Сусветнаму дню бяспечнага Інтэрнэту.

Сусветны дзень бяспечнага Інтэрнэту з’явіўся ў студзені 2004 года і адзначаецца штогод у другі аўторак лютага. Мэта свята – інфармаваць людзей аб адказным і бяспечным выкарыстанні Інтэрнэту.

Сёння Інтэрнэт – неад’емная частка нашага жыцця. Ён дае шырокія магчымасці для навучання, зносін, працы, адпачынку: эканоміць наш час, дазваляе здзяйсняць пакупкі, працаваць не выходзячы з дому, ажыццяўляць плацяжы без чэргаў. Разам з тым Сетка хавае ў сабе мноства небяспек. Неразумнае жыццё ў віртуальнай рэальнасці можа абярнуцца і стратай грошай, здароўя, дзелавой рэпутацыі, і праблемамі з праваахоўнымі органамі.

Інтэрнэт – асаблівы віртуальны свет са сваімі законамі, злачынцамі і тымі, хто ахоўвае ў ім парадак. Ён непарыўна звязаны з рэальным светам і ўжо неаддзельны ад яго, вось чаму пытанне бяспекі ў Інтэрнэце з кожным днём паўстае ўсё больш востра. З улікам выклікаў, з якімі сутыкнулася сусветная супольнасць ва ўмовах пандэміі, пытанні падтрымання належнага ўзроўню інфармацыйнай бяспекі сталі як ніколі актуальнымі.

Рэспубліка Беларусь не засталася ў баку ад сусветных працэсаў. За час яе існавання ў якасці суверэннай дзяржавы былі распрацаваны і прыняты законы “Аб Канцэпцыі інфармацыйнай бяспекі Рэспублікі Беларусь”, “Аб інфармацыі, інфарматызацыі і абароне інфармацыі”, “Аб мерах па ўдасканаленні выкарыстання нацыянальнага сегмента сеткі Інтэрнэт” і інш. Бяспечнае і паспяховае выкарыстанне Інтэрнэту немагчымы без стварэння спрыяльнага прававога рэжыму і адлюстравання яго спецыфікі ў заканадаўстве.

Экспазіцыя, якая налічвае больш за 100 дакументаў – кніг, брашур, перыядычных выданняў, аўтарэфератаў дысертацый, уключае наступныя тэматычныя раздзелы:

• Міжнародна-прававое рэгуляванне сеткі Інтэрнэт: перспектывы развіцця
• Нацыянальная бяспека Рэспублікі Беларусь у інфармацыйнай сферы
• Канстытуцыйныя абавязкі дзяржавы і грамадзян у сферы інфармацыйных праваадносін
• Інфармацыя як аб’ект грамадзянскага права
• Трансфармацыя права ў лічбавую эпоху
• Процідзеянне злачынствам, якія здзяйсняюцца з выкарыстаннем інфармацыйна-камунікацыйных тэхналогій
• Адказнасць карыстальнікаў у сацыяльных сетках
• Абарона гонару, годнасці і дзелавой рэпутацыі пры распаўсюджванні звестак у сетцы Інтэрнэт, якія няславяць чалавека
• Ахова праў дзіцяці ва ўмовах лічбавізацыі грамадскіх адносін

Выстава прызначана для спецыялістаў, якія працуюць у інтэрнэт-сферы, юрыстаў, якія займаюцца пытаннямі прававога рэгулявання інфармацыйных адносін, а таксама ўсіх карыстальнікаў сеткі Інтэрнэт.

Тэлефон для даведак: (8 017) 293 27 28.