З 21 верасня па 19 кастрычніка ў аддзеле абслугоўвання афіцыйнымі дакументамі (пам. 207) адкрыта кніжная выстава “Турызм у XXI стагоддзі”, прысвечаная Сусветнаму дню турызму.

Прапанаваная выстава налічвае каля 100 дакументаў на рускай, англійскай і нямецкай мовах. Гэта кнігі, брашуры, перыядычныя выданні, буклеты.

У гэтых дакументах разглядаюцца асноўныя тэндэнцыі развіцця міжнароднага турызму, раскрываецца паняцце ўстойлівага развіцця турызму, дадзена ацэнка сучаснаму стану сусветнай і беларускай турыстычнай індустрыі.

Экспазіцыя пазнаёміць чытачоў з асновамі арганізацыі турызму, з кіраваннем турыстычнымі прадпрыемствамі, а таксама з рознымі напрамкамі турыстычнай дзейнасці.

Сярод дакументаў, прадстаўленых на выставе, – міжнародныя прававыя дакументы, энцыклапедыі і даведнікі, манаграфіі, турыстычныя даведнікі, матэрыялы навукова-практычных канферэнцый, статыстычныя зборнікі, навучальныя дапаможнікі.

Экспазіцыя ўключае наступныя тэматычныя раздзелы:

Прававое забеспячэнне міжнароднага турызму – міжнародныя рэкамендацыі і стандарты, нарматыўна-прававыя акты
Устойлівы турызм і ўстойлівае развіццё: роля і значэнне турызму ў эканамічным і сацыяльным развіцці краін і рэгіёнаў
Роля турызму ва ўмацаванні культурных сувязей, узаемапавагі і ўзаемаразумення паміж народамі
Эканоміка, геаграфія і арганізацыя міжнароднага турызму
Развіццё індустрыі турызму і турыстычнага бізнесу ў Рэспубліцы Беларусь

Выстава будзе карысная спецыялістам у галіне турызму, арганізатарам турысцкага бізнесу, студэнтам вышэйшых навучальных устаноў турыстычнага профілю, а таксама ўсім, хто цікавіцца міжнародным турызмам і любіць падарожнічаць.

Сусветны дзень турызму быў заснаваны на трэцяй сесіі Генеральнай асамблеі Сусветнай турысцкай арганізацыі ў верасні 1979 года і штогод адзначаецца 27 верасня пачынаючы з 1980 года. Дата была абрана не выпадкова. Яна супадае з важнай у гісторыі развіцця турызму падзеяй – 27 верасня 1970 года Сусветная турысцкая арганізацыя прыняла свой Статут.

Мэта свята – прапаганда турызму, асвятленне яго ўкладу ў эканоміку сусветнай супольнасці, развіццё сувязей паміж народамі розных краін. Дадзенае мерапрыемства заклікана прадэманстраваць патэнцыял турызму ў справе дасягнення Мэт у галіне ўстойлівага развіцця.

Свята адзначаецца ў большасці краін свету і кожны год праходзіць пад новым дэвізам. Згодна з рашэннем, прынятым на 24-й сесіі Генеральнай асамблеі ЮНВТО, афіцыйныя ўрачыстасці з нагоды Сусветнага дня турызму ў 2022 годзе пройдуць на востраве Балі ў Інданэзіі пад дэвізам “Пераасэнсаванне турызму”.

Развіццё турызму з’яўляецца адным з прыярытэтных напрамкаў сацыяльна-эканамічнага развіцця Рэспублікі Беларусь. Дзяржаўная праграма “Беларусь гасцінная” на 2021–2025 гады накіравана на фарміраванне і развіццё сучаснага канкурэнтаздольнага турыстычнага комплексу, павелічэнне ўкладу турызму ў развіццё нацыянальнай эканомікі – турызм паступова становіцца адной з ключавых галін для стварэння новых працоўных месцаў, эканамічнага росту і прыцягнення інвестыцый.

Турыстычны патэнцыял Беларусі заключаецца ў разнастайнасці і прыгажосці прыроды, унікальнасці гісторыка-культурнай спадчыны.

Карысныя спасылкі