Дата правядзення
Час правядзення
Месца правядзення
З 11 жніўня па 19 верасня ў аддзеле абслугоўвання афіцыйнымі дакументамі (пам. 207) адкрыта тэматычная выстава “Моладзь: дыялог і ўзаемаразуменне”, прысвечаная Міжнароднаму дню моладзі.
Экспазіцыя пазнаёміць чытача з міжнароднымі прававымі дакументамі і праграмамі, якія былі прыняты з мэтай паляпшэння жыцця маладога пакалення, з матэрыяламі, у якіх раскрываюцца праблемы і задачы, што стаяць перад моладдзю, а таксама з дакументамі па маладзёжнай палітыцы, якая праводзіцца ў Рэспубліцы Беларусь і іншых краінах.
Выстава налічвае каля 90 дакументаў на рускай і англійскай мовах: кнігі, перыядычныя выданні, брашуры, буклеты, мімеаграфаваныя матэрыялы. Большую частку экспазіцыі складаюць дакументы міжнародных арганізацый, у тым ліку даклады і справаздачы ААН: даклад аб сусветным развіцці, сусветны даклад аб становішчы моладзі, нацыянальны даклад аб становішчы моладзі ў Рэспубліцы Беларусь, даклады Міжнароднай арганізацыі працы аб занятасці моладзі.
Сярод прадстаўленых на выставе дакументаў – статыстычныя зборнікі, нарматыўна-прававыя дакументы па пытаннях маладзёжнай палітыкі, зборнікі навуковых артыкулаў, матэрыялы канферэнцый, навучальныя дапаможнікі, навуковыя даклады, аналітычныя агляды, манаграфіі.
Выстава ўключае наступныя тэматычныя раздзелы:
- Становішча моладзі ў сучасным свеце
- Міжнародныя прававыя дакументы і праграмы адносна моладзі
- Адукацыя моладзі
- Моладзь і рынак працы
- Здароўе моладзі
- Дзяржаўная маладзёжная палітыка Рэспублікі Беларусь
Выстава будзе цікавая выкладчыкам, навуковым работнікам, студэнтам, спецыялістам у галіне дэмаграфіі, сацыёлагам, работнікам органаў дзяржаўнага кіравання, а таксама ўсім, хто цікавіцца пытаннямі маладзёжнай палітыкі ў нашай краіне і свеце.
Міжнародны дзень моладзі быў заснаваны Генеральнай асамблеяй ААН 17 снежня 1999 года (рэзалюцыя 54/120) і штогод адзначаецца 12 жніўня пачынаючы з 2000 года. Свята было ўстаноўлена па прапанове Сусветнай канферэнцыі міністраў па справах моладзі, якая адбылася ў Лісабоне ў жніўні 1998 года.
Асноўнай мэтай свята з’яўляецца інфармаванне грамадства аб той ролі, якую адыгрываюць маладыя людзі ў развіцці і пабудове свету, а таксама напамін аб паўсядзённых праблемах, што стаяць на іх шляху. Міжнародны дзень моладзі прысвечаны правам маладых людзей на поўны доступ да адукацыі, адэкватнай аховы здароўя, магчымасцей працаўладкавання, фінансавых паслугах і паўнавартаснага ўдзелу ў грамадскім жыцці.
Сёння ў свеце налічваецца 1,2 млрд маладых людзей ва ўзросце ад 15 да 24 гадоў, што складае 16 працэнтаў сусветнага насельніцтва.
Усведамляючы ўсю важнасць праблем і задач, якія стаяць перад моладдзю, Арганізацыя Аб’яднаных Нацый накіроўвае ўсе свае намаганні на эфектыўнае рашэнне гэтых праблем на глабальным, рэгіянальным і нацыянальным узроўнях.
Карысныя спасылкі
- Міжнародны дзень моладзі
- Сусветны дзень навыкаў моладзі (15 ліпеня)
- Міжнародны дзень дзяўчынак (11 кастрычніка)
- Сусветны дзень дзіцяці (20 лістапада)
- Міжнародны год моладзі (2010)
Асноўныя дакументы
- Рэзалюцыя 54/120 Генеральнай асамблеі аб абвяшчэнні Дня (1999)
- Лісабонская дэкларацыя па пытаннях маладзёжнай палітыкі і праграм (1998)
- Сусветная праграма дзеянняў у інтарэсах моладзі на перыяд да 2000 г. і на наступны перыяд (1995) і дадатак да яе (2007)
- Правілы ААН адносна абароны непаўналетніх, пазбаўленых свабоды (1990)
- Мінімальныя стандартныя правілы ААН адносна адпраўлення правасуддзя ў дачыненні да непаўналетніх (“Пекінскія правілы”, 1985)
- Дэкларацыя аб распаўсюджванні сярод моладзі ідэалаў свету, узаемнай павагі і ўзаемаразумення паміж народамі (1965)
- Даклад аб становішчы моладзі 2020 года
- Глабальныя тэндэнцыі занятасці моладзі, 2020 год: Тэхналогіі і будучыня сферы працы
- Моладзь-2030: Стратэгія ААН па пытаннях моладзі
- Глабальны даклад аб дзейнасці ААН па пытаннях моладзі
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 34.
Матэрыял пададзены аддзелам абслугоўвання афіцыйнымі дакументамі.