Ажурную закладку прапануюць зрабіць у бібліятэцы

Нацыянальная бібліятэка Беларусі працягвае цыкл майстар-класаў з вядомымі майстрамі Беларусі ў межах выставачнага праекта “Жывыя крыніцы”, прымеркаванага да Года гістарычнай памяці.

21 чэрвеня а 10-й гадзіне і 23 чэрвеня а 16-й гадзіне ў выставачным комплексе (пам. 104) адбудуцца сустрэчы з сябрам Беларускага саюза майстроў народнай творчасці Юліяй Лукашэвіч па вырабе закладкі для кнігі ў тэхніцы “выцінанка”.

Мастацтва выразання ажурных узораў існуе з тых часоў, калі ў Кітаі была вынайдзена тэхналогія стварэння паперы. У Беларусі тэхніка выцінанкі мела шырокае распаўсюджанне ў ХІХ – пач. ХХ ст, тады амаль у кожнай сялянскай хаце можна было сустрэць такі элемент упрыгожвання інтэр’ера на сценах, вокнах, паліцах. Хоць сёння выцінанкі згубілі сваё практычнае, утылітарнае прымяненне, аднак дзякуючы сучасным майстрам набылі адметнае мастацкае ўвасабленне і гучанне.

Сучасная беларуская выцінанка ўражвае сваімі выяўленчымі якасцямі, гульнёй сіметрыі і разнастайнасцю тэм і вобразаў, тэхнікай выканання і, абавязкова, арыентацыяй на традыцыйныя народныя матывы.

Вялікай папулярнасцю тэхніка “ажурнага выразання” карыстаецца сярод дзяцей, якія ахвотна фантазіруюць з лісточкам паперы і нажніцамі. Каб засвоіць дадзены від дэкаратыўна-прыкладнога мастацтва неабходна жаданне, крышачку цярпення і добрае абсталяванне, якое будзе падрыхтавана на нашым майстар-класе.

Разам з майстрам Юліяй Лукашэвіч вы зможаце зрабіць непаўторную рознакаляровую ажурную закладку для сваёй любімай кніжкі або падарыць яе сябрам і блізкім.

Для наведвальнікаў патрэбна абавязковая рэгістрацыя: (8 017) 293 27 50.

• для дарослых – 6 рублёў;
• для навучэнцаў сярэдніх, сярэднеспецыяльных і вышэйшых устаноў – 3 рублі;
• сямейны квіток (2 дарослых з дзіцём да 16 гадоў) – 11 рублёў;
• сямейны квіток (2 дарослых з 2 дзецьмі да 16 гадоў) – 13 рублёў;
• шматдзетныя сем’і (пры прад'яўленні дакумента) – 13 рублёў.

• дзеці да 7 гадоў і выхаванцы дзіцячых дамоў, людзі з абмежаванымі магчымасцямі (пры прад’яўленні дакумента);
• суправаджаючыя груп школьнікаў, выхаванцаў устаноў адукацыі (1 чалавек на 10 дзяцей).

Час работы выстаўкі адпавядае рэжыму работы бібліятэкі.