100 рарытэтаў: ад гістарычных кнігазбораў да сучасных арт-кніг

26 мая а 16-й гадзіне ў музеі кнігі (пам. 347) ладзіцца адкрыццё выставы “100 рарытэтаў: ад гістарычных кнігазбораў да сучасных арт-кніг”.

Выстава прысвечана гісторыі фарміравання фонду Нацыянальнай бібліятэкі Беларусі і дэманструе найбольш значныя і каштоўныя ўзоры беларускай і сусветнай кніжнай спадчыны, назапашанай за 100 гадоў.

Фонд галоўнай бібліятэкі краіны на сённяшні дзень налічвае звыш 10 мільёнаў экзэмпляраў. У гэтым багацці ведаў вылучаецца сваёй унікальнасцю калекцыя рукапісаў і друкаваных выданняў XV – пачатку XXI ст., якая пачала фарміравацца адначасова з заснаваннем бібліятэкі ў 1922 г. У яе аснову ўвайшлі былыя магнацкія і шляхецкія бібліятэкі, бібліятэчныя зборы розных устаноў, прыватныя кнігазборы вядомых дзеячаў культуры, мастацтва, навукі і г.д.

Экспазіцыя “100 рарытэтаў: ад гістарычных кнігазбораў да сучасных арт-кніг” знаёміць наведвальнікаў з калекцыямі рукапісаў, інкунабул, палеатыпаў, старадрукаваных кніг XVI–XVIII стст., рэдкіх кніг XIX – пачатку XXI ст.

Выстава адлюстроўвае эвалюцыю кнігі і фондаў бібліятэкі. Тут можна пабачыць кнігі на розных матэрыялах: пачынаючы з гліняных таблічак, пальмавых лістоў, пергаменту і заканчваючы паперай; і кнігі розных форм – ад скрутка да кодэкса. Шэраг асобнікаў экспануецца ўпершыню.

Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.

Выстава будзе працаваць да 31 снежня 2022 г.
Дата яе заканчэння можа быць зменена.

Тэлефоны для даведак: (8 017) 293 27 81, 293 27 22.