Дата правядзення
Час правядзення
Месца правядзення
З 18 мая па 29 чэрвеня ў аддзеле абслугоўвання афіцыйнымі дакументамі (пам. 207) адкрыта тэматычная выстава “Дыялог культур у шматпалярным свеце”, прысвечаная Сусветнаму дню культурнай разнастайнасці ў імя дыялогу і развіцця.
Прапанаваная чытачам экспазіцыя налічвае каля 100 дакументаў на рускай, англійскай, французскай і нямецкай мовах. Дакументы раскрываюць шматгранную дзейнасць ААН, ЮНЕСКА і іншых міжнародных арганізацый у галіне падтрымання і захавання самабытнасці і індывідуальнасці розных сусветных культур. У іх разглядаюцца праблемы рэзкага скарачэння шырыні культурнай разнастайнасці ў сучасным свеце і падкрэсліваецца важнасць прыняцця своечасовых мер для захавання множнасці культур.
На выставе таксама прадстаўлены дакументы, у якіх разглядаюцца пытанні міжнародна-прававога рэгулявання ў галіне культуры, такія як Усеагульная дэкларацыя ЮНЕСКА аб культурнай разнастайнасці, Канвенцыя аб ахове сусветнай культурнай і прыроднай спадчыны, Канвенцыя аб ахове і падтрыманні разнастайнасці форм культурнага самавыяўлення і інш.
Большую частку экспазіцыі складаюць дакументы міжнародных арганізацый: кнігі, брашуры, мімеаграфаваныя матэрыялы ААН, перыядычныя выданні, буклеты.
Экспазіцыя ўключае наступныя тэматычныя раздзелы:
- Дыялог культур у інтарэсах устойлівага развіцця
- Глабалізацыя і культурная разнастайнасць
- Культура міру
- Міжрэлігійны дыялог – важны кампанент збліжэння культур
- Ахова моўнай разнастайнасці і падтрыманне шматмоўя
- Узаемадзеянне культур: Рэспубліка Беларусь і краіны свету
Сусветны дзень культурнай разнастайнасці ў імя дыялогу і развіцця быў абвешчаны Генеральнай асамблеяй ААН 20 снежня 2002 года (рэзалюцыя A/RES/57/249) і штогод святкуецца 21 мая пачынаючы з 2003 года.
Гэты Дзень дае сусветнай супольнасці магчымасць глыбей усвядоміць каштоўнасці культурнай разнастайнасці і навучыцца развіваць супрацоўніцтва паміж народамі. У рэзалюцыі адзначаецца, што справядлівы абмен і дыялог паміж цывілізацыямі і культурамі на аснове ўзаемаразумення, павагі і роўнай годнасці ўсіх культур – неабходная ўмова для дасягнення сацыяльнай згуртаванасці і міру паміж народамі.
Разнастайнасць культурных форм уключае матэрыяльны і нематэрыяльны складнікі, а таксама індустрыю творчасці і разнастайнасць форм культурнага самавыяўлення. Гэты Дзень дае падставу падумаць над тым, якім чынам разнастайнасць форм культурнага самавыяўлення спрыяе дыялогу, узаемаразуменню, а таксама фарміраванню сацыяльных, экалагічных і эканамічных фактараў устойлівага развіцця.
Карысныя спасылкі
- 21 мая – Сусветны дзень культурнай разнастайнасці ў імя дыялогу і развіцця
- Першы тыдзень лютага – Сусветны тыдзень гарманічных міжканфесійных адносін
- 2010 год – Міжнародны год збліжэння культур (A/RES/62/90)
- 2008 год – Міжнародны год моў (A/RES/61/266)
- 2000 год – Міжнародны год культуры міру (A/RES/52/15)
- 1995 год – Год Арганізацыі Аб’яднаных Нацый, прысвечаны цярпімасці (A/RES/48/126)
- 2001–2010 гады – Міжнароднае дзесяцігоддзе культуры міру і ненасілля ў інтарэсах дзяцей планеты (A/RES/59/143)
Дэкларацыі, канвенцыі і пагадненні
- Астанінская дэкларацыя, прынятая ўдзельнікамі канферэнцыі міністраў па тэме “Агульны мір: прагрэс праз разнастайнасць” (Казахстан, 17 кастрычніка 2008 года)
- Мадрыдская дэкларацыя, прынятая Сусветнай канферэнцыяй па дыялогу, арганізаванай Сусветнай мусульманскай лігай у Мадрыдзе пад эгідай Захавальніка дзвюх святых мячэцей караля Абдалы ібн Абдуль Азіза аль Сауда (16–18 ліпеня 2008 года)
- Пнампеньскі дыялог 2008 года аб міжканфесійным супрацоўніцтве ў інтарэсах міру і згоды
- Бакінская дэкларацыя аб пашырэнні ролі жанчын у міжкультурным дыялогу
- Дэкларацыя ААН аб правах карэнных народаў (2007)
- Дэкларацыя аб садзейнічанні дыялогу і ўзаемаразуменню паміж рэлігіямі і цывілізацыямі (“Охрыд 2007”)
- Дэкларацыя Другога з’езда сусветных і традыцыйных рэлігій (23–24 верасня 2006 года, Астана, Казахстан)
- Балійская дэкларацыя аб наладжванні гарманічных міжканфесійных адносін у рамках міжнароднай супольнасці (21–22 ліпеня 2005 года, Балі, Інданезія)
- Канвенцыя аб ахове і падтрыманні разнастайнасці форм культурнага самавыяўлення 2005 г.
- Міжнародная канвенцыя аб ахове нематэрыяльнай культурнай спадчыны 2003 г.
- Канвенцыя аб ахове падводнай культурнай спадчыны 2001 г.
- Канвенцыя аб ахове сусветнай культурнай і прыроднай спадчыны 1972 г.
- Канвенцыя аб мерах, накіраваных на забарону і папярэджанне незаконнага ўвозу, вывазу і перадачы права ўласнасці на культурныя каштоўнасці 1970 г.
- Канвенцыя аб абароне культурных каштоўнасцей у выпадку ўзброенага канфлікту 1954 г.
- Усеагульная дэкларацыя ЮНЕСКА аб культурнай разнастайнасці (2001)
- Глабальны парадак дня для дыялогу паміж цывілізацыямі (2001)
- Дэкларацыя аб культуры міру і праграма дзеянняў у галіне культуры міру (1999)
- Тэгеранская дэкларацыя аб дыялогу паміж цывілізацыямі, прынятая на Ісламскім сімпозіуме па дыялогу паміж цывілізацыямі (1999)
- Дэкларацыя прынцыпаў цярпімасці (1995)
- Дэкларацыя аб правах асоб, якія належаць да нацыянальных або этнічных, рэлігійных і моўных меншасцей (1992)
Выстава будзе цікавая лінгвістам, філолагам, супрацоўнікам устаноў культуры і мастацтва, гісторыкам, а таксама шырокаму колу чытачоў, якія цікавяцца пытаннямі ўзаемадзеяння культур, моўнай і культурнай разнастайнасцю.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 34.
Матэрыял пададзены аддзелам абслугоўвання афіцыйнымі дакументамі.