Дата правядзення
Час правядзення
Месца правядзення
19 красавіка ў галерэі “Атрыум” (3-ці паверх) адбудзецца адкрыццё казачнай выстаўкі “Магія графікі”, прымеркаванай да 75-годдзя беларускага мастака Валерыя Слаука.
Валерый Пятровіч – аўтар сотняў візуальных увасабленняў беларускіх і замежных фальклорных персанажаў, аўтарскіх фантастычных сюжэтаў. Містычныя вобразы яго герояў зачароўваюць не адно пакаленне дзяцей і дарослых. Кожная кампазіцыя і кожная гісторыя ў прасторы графічнага ліста – выяўленчы літаратурны твор з характэрнымі аўтарскімі вынаходкамі, містычным гучаннем, прапісанымі да дробязей персанажамі і іх навакольным светам.
У экспазіцыі наведвальнікі змогуць убачыць традыцыйныя казачныя вобразы сусветнай і беларускай міфалогіі – улюбёную тэму мастака. Сярод работ – харызматычныя каты, казуркі, чараўнікі, дамавікі, волаты, русалкі, вадзянікі і шмат іншых фантастычных стварэнняў. Ювелірная дакладнасць, мноства дэталяў, мяккая карыкатурнасць персанажаў, насычаны дробязямі фон падзей, дынамічнасць сюжэтаў падштурхоўваюць разглядаць чароўныя творы мастака зноў і зноў, знаходзіць новыя цікавыя гісторыі.
Магія графікі Валерыя Слаука – у яе загадкавасці, шматзначнасці, тонкай іроніі. Яна чаруе гледачоў і заклікае ўслед за аўтарам паглыбіцца ў магічны казачны свет.
Усе работы ў экспазіцыі – з калекцыі сябра і творчага паплечніка Валерыя Пятровіча – Рыгора Сцяпанава.
Валерый Слаук – знакаміты ілюстратар, удзельнік шматлікіх выставачных праектаў у Беларусі і за мяжой, узнагароджаны медалём Францыска Скарыны (2010), дыпламант 1-й ступені Міжнароднага конкурсу “Мастацтва кнігі” (Масква, 2009), пераможца ў намінацыі “Лепшы майстар” Нацыянальнага конкурсу “Мастацтва кнігі” (2008), лаўрэат прэміі “Лепшы ілюстратар года” (2008).
Час работы выстаўкі адпавядае рэжыму работы бібліятэкі.
На адкрыццё ўваход вольны, у астатні час – па чытацкім білеце або білеце сацыякультурнага цэнтра.
Выстаўка будзе працаваць да 8 чэрвеня 2022 г.
Дата заканчэння працы экспазіцыі можа быць зменена.
Тэлефон для даведак: (8 017) 368 37 37.
Глядзіце рэпартаж тэлеканала "Беларусь 1".
Матэрыял падрыхтаваны аддзелам сувязей з грамадскасцю.