Жавароначкі, прыляціце, вясну-красну прынясіце!

Нацыянальная бібліятэка Беларусі працягвае цыкл майстар-класаў з вядомымі народнымі майстрамі Беларусі ў межах выставачнага праекта “Жывыя крыніцы”, прымеркаванага да Года гістарычнай памяці.

14 красавіка а 16-й гадзіне ў выставачным комплексе (пам. 104) адбудзецца сустрэча з дыпламантам фестываляў і свят, сябрам Беларускага саюза майстроў народнай творчасці Наталляй Гамаюнавай па вырабе аб’ёмнай цацкі “птушка” ў тэхніцы “выцінанка”.

Адзін з відаў самабытнага народнага дэкаратыўна-прыкладнога мастацтва – выцінанка – быў распаўсюджаны ў народным побыце ў канцы ХІХ – пачатку ХХ ст. Беларускія выцінанкі ствараліся пераважна аднаколернымі, а іх малюнак залежаў ад прызначэння вырабу, фантазіі, умення аўтара і ад рэгіёна, у якім ён жыў. Сучасная беларуская выцінанка характарызуецца багатай тэматыкай, разнастайнай тэхнікай выканання, арыгінальнымі дызайнерскімі рашэннямі, але заўсёды пры гэтым арыентуецца на народныя традыцыйныя матывы.

На майстар-класе наведвальнікі змогуць зрабіць аб’ёмны вобраз жаўрука. Гэтая птушка адной з першых прылятала з выраю, лічылася “вестуном” вясны і любімым у народзе вобразам узнёслай душы. Такія абярэгі нашы продкі вешалі на дрэвы напрадвесні старажытнага свята “Гуканне вясны”.

• для дарослых – 6 рублёў;
• для навучэнцаў сярэдніх, сярэднеспецыяльных і вышэйшых устаноў – 3 рублі;
• сямейны квіток (2 дарослых з дзіцём да 16 гадоў) – 11 рублёў;
• сямейны квіток (2 дарослых з 2 дзецьмі да 16 гадоў) – 13 рублёў;
• шматдзетныя сем’і (пры прад'яўленні дакумента) – 13 рублёў.

• дзеці да 7 гадоў і выхаванцы дзіцячых дамоў, людзі з абмежаванымі магчымасцямі (пры прад’яўленні дакумента);
• суправаджаючыя груп школьнікаў, выхаванцаў устаноў адукацыі (1 чалавек на 10 дзяцей).

Час работы выстаўкі адпавядае рэжыму работы бібліятэкі.

Тэлефоны для даведак: (8 017) 293 28 81 (для СМІ), 293 27 50, 368 37 37 (для даведак).

Матэрыял падрыхтаваны аддзелам сувязей з грамадскасцю.