Выстава акварэлі Марыі Сыракваш “Вандроўкі ў мінулае”

24 сакавіка ў галерэі “Панарама” (22-гі паверх) пачала працу выстава акварэлі Марыі Сыракваш “Вандроўкі ў мінулае”, прымеркаваная да Года гістарычнай памяці.

Марыя Сыракваш – маладая беларуская мастачка. Вучылася ў Мінскай дзяржаўнай гімназіі-каледжы мастацтваў, у 2019 годзе паступіла ў Беларускую дзяржаўную акадэмію мастацтваў на адзяленне графікі. Працуе ў галіне акварэльнага жывапісу. Марыя – удзельніца шматлікіх выставачных праектаў, інсталяцый, перформансаў, тэматычных конкурсаў сярод навучэнцаў.

“Вандроўкі ў мінулае” знаёмяць з улюбёнымі аб’ектамі акварэльнага жывапісу мастачкі – архітэктурнымі помнікамі, якія і сёння можна ўбачыць падчас падарожжа па Беларусі.

Выстава – вынік шматлікіх вандровак “нон-стоп” па Беларусі і ў гістарычную мінуўшчыну роднай зямлі, наведвання знакавых мясцiн i малавядомых куткоў. “У маёй падсвядомасцi адбiлiся выявы старых сядзiб i палацаў, каплiц i храмаў, старых паркавых дрэў i пакрытых iмхамi камянёў”, – кажа Марыя. У многiх мясцiнах мастачка бывала па некалькi разоў i на ўласныя вочы бачыла, як бязлiтасны час лiтаральна на вачах давяршае тое, што не паспелi зрабiць людзi. Так нарадзiлася iдэя адлюстраваць у выглядзе серыі акварэльных малюнкаў бясконцы карагод вобразаў знiкаючай Беларусi, паказаць іх чароўную прыгажосць i скамянелую гiсторыю. Серыя складаецца з некалькiх дзясяткаў прац, створаных у перыяд 2019–2021 гг.

У экспазіцыі – Крэўскі і Смалянскі замкі, царква і касцёл у Ракаве, сядзібы Рэйтанаў, Дамейкаў, Храптовічаў, касцёл у Івянцы, капліца ў Залессі, кляштар картузіянцаў, краявіды навокал Гальшанскага замка, Наваградскага фарнага касцёла і інш. На паперы зіхацяць адбіткі дзіўных дрэў, вясковых дахаў, наліваюцца дажджом нябёсы.

Бязважкасць, свежасць, атмасфернасць і празрыстасць уласцівы акварэлям мастачкі. Яе асаблівая палітра – жывапісныя колеры, упэўненыя лініі, абстрактныя вобразныя элементы, эмацыянальны кантэкст. Уяўны парыў ветра, рух травы, гульня святла на вежах, сакавітыя фарбы – акварэльныя пейзажы нібыта матэрыялізуюцца ў паветры і ўяўленні, прымройваюцца гледачам – настолькі насычана кожная выява.

Выстава прымеркавана да Года гістарычнай памяці. Сапраўды, варта ўзгадаць культурнае багацце краіны, годнасць архітэктуры, шэраг гістарычных падзей, якія стаяць за кожным помнікам, вежай, царквой і касцёлам. Рамантычныя і шчырыя акварэльныя вобразы аўтаркі даюць магчымасць зазірнуць праз чароўнае акно ў свет слаўнага мінулага нашай краіны, усвядоміць, што гістарычнае мінулае калісьці было сённяшнім днём, што зробленае ўчора дасць плён заўтра.

Выстаўка будзе працаваць да 26 мая 2022 г.
Дата заканчэння працы экспазіцыі можа быць зменена.

Тэлефон для даведак: (8 017) 293 28 33.

Матэрыял пададзены аддзелам галерэйна-выставачнай дзейнасці.