Дата правядзення
Час правядзення
Месца правядзення
10 сакавіка ў музеі кнігі адбылося адкрыццё незвычайнай выставы сапраўдных кніжных скарбаў, якія нядаўна былі адшуканы ў адным з старадаўніх беларускіх манастыроў.
Упершыню для шырокай публікі прадстаўлена ўнікальная магчымасць убачыць па сутнасці фрагмент архіва старадаўняй друкарні – неразрэзаныя і незбрашураваныя аркушы XVII і XVIII стагоддзяў, падрыхтаваныя для далейшай працы пераплётчыкаў. На кожным з вялікіх друкарскіх аркушаў размяшчалася па восем старонак тэксту, якія ў далейшым павінны былі адпаведным чынам складвацца ў асобныя стосы, сшывацца разам, абразацца і пераплятацца ў прывычную нам сёння форму кнігі-кодэкса.
Па невядомых нам прычынах частка тыражу двух выданняў не прайшла адпаведную апрацоўку і засталася ў стосах з асобных аркушаў, якія на працягу некалькіх стагоддзяў захоўваліся ў сховах былога Гродзенскага манастыра брыгітак. Сёння яны дазваляюць нам атрымаць добрае ўяўленне пра тое, як друкаваліся кнігі ў мінулыя стагоддзі, асэнсаваць і візуальна ўявіць старажытную тэхналогію збірання і пераплёту выданняў.
Сёння мы нават можам гаварыць пра змест і назвы двух выданняў, якія павінны былі атрымаць форму кнігі яшчэ некалькі стагоддзяў таму назад. Гэта “Статут ордэна брыгітак” 1673 г. і “Брэвіярыум” 1748 г.
Разам з гэтымі незвычайнымі матэрыяламі са старажытнай друкарні ў музеі кнігі будуць экспанавацца элементы кніжнага пераплёту і аналагічныя старадрукаваныя кнігі ў “закончаным выглядзе” з фондаў Нацыянальнай бібліятэкі Беларусі.
Комплекс Брыгіцкага манастыра і касцёла займае цэлы квартал у цэнтральнай частцы Гродна і складаецца з касцёла, манастыра, арыгінальнага драўлянага лямуса і высокай каменнай агароджы з брамамі і вуглавымі васьміграннымі вежамі. Раней у склад комплексу ўваходзіла і высокая вежа-званіца, якая знаходзілася на супрацьлеглым баку вуліцы. Некалі гэта быў адзіны ў Беларусі храм і манастыр ордэна Святой Брыгіты, пабудаваны на ахвяраванні мясцовага магната К. Весялоўскага ў 1634–1642 гг. у стылі барока. Сёння ансамбль манастыра з’яўляецца помнікам архітэктуры рэспубліканскага значэння.
Выстава будзе працаваць у музеі кнігі (пам. 347) да 10 красавіка 2022 г.
Дата яе завяршэння можа быць зменена.
Час работы выставы адпавядае рэжыму работы музея кнігі.
Уваход на адкрыццё вольны. У астатнія дні – па чытацкім білеце
або білеце сацыякультурнага цэнтра.
Тэлефоны для даведак: (8 017) 293 27 81, 293 27 22, 293 27 79.
Матэрыял пададзены навукова-даследчым аддзелам кнігазнаўства.
Глядзіце таксама відэарэпартаж АНТ пра выстаўку.