Дата правядзення
Час правядзення
Месца правядзення
C 12 студзеня па 9 лютага ў аванзале аддзела абслугоўвання афіцыйнымі дакументамі (пам. 207) адкрыта тэматычная выстаўка “Халакост: навечна ў памяці людской”, прысвечаная Міжнароднаму дню памяці ахвяр Халакосту.
Гэты Дзень быў заснаваны 1 лістапада 2005 года на 60-й сесіі Генеральнай асамблеі ААН (рэзалюцыя 60/7 “Памяць пра Халакост”) і штогод адзначаецца 27 студзеня – у дзень вызвалення савецкімі войскамі ў 1945 годзе найбуйнейшага нацысцкага канцэнтрацыйнага лагера Асвенцым-Біркенаў.
Ініцыятарамі прыняцця рэзалюцыі выступілі Ізраіль, Канада, Аўстралія, Расія, Украіна, ЗША, а іх суаўтарамі – яшчэ больш за 90 дзяржаў. У дакуменце падкрэслівалася, што Халакост, які прывёў да вынішчэння адной траціны яўрэйскага народа і вялікай колькасці прадстаўнікоў іншых меншасцей, ніколі не павінен быць забыты і што гэтая трагедыя заўсёды будзе служыць усім народам перасцярогай ад небяспекі, якую ўтойваюць у сабе нянавісць, фанатызм, расізм і прымхі.
Каб урокі Халакосту назаўжды захаваліся ў памяці наступных пакаленняў і спрыялі прадухіленню актаў генацыду ў будучым, адпаведна гэтай рэзалюцыі была заснавана Праграма асветніцкай дзейнасці “Халакост і Арганізацыя Аб'яднаных Нацый”.
Праграма прадугледжвае цеснае супрацоўніцтва з тымі, хто перажыў Халакост, каб іх галасы былі пачутыя і гучалі як папярэджанне аб наступствах антысемітызму і іншых формаў дыскрымінацыі. Праграмай запланаваны міжнародныя кампаніі, семінары, прагляд кінафільмаў, выставы, падрыхтоўка навучальных матэрыялаў для педагогаў і студэнтаў.
Беларусь была адной з краін-суаўтараў рэзалюцыі “Памяць пра Халакост”. Мерапрыемствы, прысвечаныя гэтай трагедыі, штогод праводзяцца і ў нас у рэспубліцы.
У гады вайны Беларусь страціла кожнага трэцяга жыхара і прайшла праз усе жахі Халакосту. На акупаванай нацыстамі тэрыторыі краіны было створана больш за дзве з паловай сотні лагераў смерці і месцаў масавага знішчэння людзей. Сярод іх – Мінскае гета, а таксама найбуйнейшы на тэрыторыі Беларусі нацысцкі лагер смерці “Трасцянец”, у якім знішчаліся мірныя жыхары, ваеннапалонныя і яўрэйскае насельніцтва, дэпартаванае з Аўстрыі, Германіі, Польшчы і іншых краін.
Прапанаваная чытачам выстаўка налічвае больш за 70 дакументаў на рускай, нямецкай і англійскай мовах: кнігі, перыядычныя выданні, брашуры, буклеты. Сярод іх – гістарычныя, дакументальныя, мемуарныя дакументы, якія распавядаюць пра Халакост як адно з самых жахлівых злачынстваў нацыстаў. Усе матэрыялы – гэта сведчанне павагі да тых, хто выжыў, і даніна памяці загінулым ахвярам. Яны адлюстроўваюць надзею на тое, што вывучэнне гэтай трагедыі падштурхне чалавецтва рашуча адмовіцца ад усіх форм расізму, насілля і антысемітызму.
Экспазіцыя складаецца з наступных тэматычных раздзелаў:
- Гісторыя Халакосту ў Еўропе
- Пра гэта немагчыма забыцца (успаміны пра Халакост)
- Урокі Халакосту
- Халакост на тэрыторыі Беларусі
Выстава будзе цікавая гісторыкам, спецыялістам у галіне міжнароднага права, сусветнай палітыкі, міжнародных адносін і праў чалавека, а таксама студэнтам, магістрантам, выкладчыкам.
Карысныя спасылкі
- Міжнародны дзень памяці ахвяр Халакосту
- Халакост і Арганізацыя Аб'яднаных Нацый: праграма асветніцкай дзейнасці
- 28-я спецыяльная сесія Генеральнай асамблеі “Святкаванне шасцідзясятай гадавіны вызвалення нацысцкіх канцэнтрацыйных лагераў” (24 студзеня 2005 года)
- Міжнародная канферэнцыя, прысвечаная асвеце па пытаннях Халакосту і генацыду
Дакументы
- Рэзалюцыя Генеральнай асамблеі “Адмаўленне Халакосту” (26 студзеня 2007 года)
- Рэзалюцыя Генеральнай асамблеі “Памяць аб Халакосце” (1 лістапада 2005 года)
- Даклад Сусветнай канферэнцыі па барацьбе супраць расізму, расавай дыскрымінацыі, ксенафобіі і звязанай з імі нецярпімасці (Дурбан, 31 жніўня – 8 верасня 2001 года)
- Міжнародная канвенцыя аб ліквідацыі ўсіх формаў расавай дыскрымінацыі (21 снежня 1965 года)
- Прынцыпы міжнароднага супрацоўніцтва адносна выяўлення, арышту, выдачы і пакарання асоб, вінаватых у ваенных злачынствах і злачынствах супраць чалавецтва (3 снежня 1973 года)
- Канвенцыя аб невыкарыстанні тэрміну даўніны да ваенных злачынстваў і злачынстваў супраць чалавецтва (26 лістапада 1968 года)
- Канвенцыя па папярэджанні і пакаранні злачынства генацыду (9 снежня 1948 года)
- Міжнародная канферэнцыя, прысвечаная асвеце па пытаннях Халакосту і генацыду (даклад аб ходзе работы, 2017 год)
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 34.
Матэрыял пададзены аддзелам абслугоўвання афіцыйнымі дакументамі.