Дата правядзення
Час правядзення
Месца правядзення
З 17 лістапада 2021 г. па 4 студзеня 2022 г. у зале беларускай літаратуры (пам. 205) праходзіць выстаўка “Небасхіл паэзіі Алеся Каско”, прысвечаная 70-годдзю з дня нараджэння паэта.
Алесь Каско – паэт філасофска-інтэлектуальнай плыні беларускай паэзіі. Плён яго творчай працы – кнігі вершаў, навел і дзённікавых запісаў. Першая асобная паэтычная кніга “Скразная лінія” прасякнута любоўю да прыроды роднага краю, трывогай за яго будучае. Вершамі зборніка “Час прысутнасці” Каско раскрыў сябе як паэт-грамадзянін. На яго творчым рахунку таксама кнігі паэзіі “45: вершы”, “Прынадхінуты небасхіл”, “Набліжэнне”, “Трохперсце” (у суаўтарстве), “Межавыя знакі. Кнігай вершаў “Нічога больш” Алесь Каско заявіў аб сабе як літаратурны перакладчык з македонскай, польскай, нямецкай, украінскай моў. У апошнім зборніку выбранай паэзіі “Кругабег” – вершы-роздумы пра пройдзенае і перажытае.
Алесь Каско пісаў таксама для дзяцей. Выдаў кнігу сабраных і запісаных ім на Берасцейшчыне народных чарадзейных казак “Чыстага ўсё нячыстае баіцца”, таксама кніжку вершаў “Два сонцы”.
Алесь Каско – аўтар прадмоў да шэрага зборнікаў паэтаў з Берасцейскай зямлі: Алеся Паплаўскага, Міколы Пракаповіча, Лявона Валасюка і інш.
На выстаўцы прадстаўлены аўтарскія і калектыўныя зборнікі з вершамі Алеся Каско, часопісы з публікацыямі яго паэтычных твораў, выданні ў яго рэдакцыі і з яго прадмовамі, матэрыялы аб жыцці і творчасці паэта.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.
