Дата правядзення
Час правядзення
Месца правядзення
6 ліпеня ў галерэі “Лабірынт” (3-ці паверх) адкрылася выстаўка “Манумент”, якая праходзіць у межах Рэспубліканскага фестывалю манументальнага мастацтва.
Маштабны выставачны марафон, які аб'ядноўвае на розных арт-пляцоўках сталіцы мастакоў-манументалістаў з Мінска і рэгіёнаў Беларусі, знаёміць гледачоў з новымі тэндэнцыямі ў сучасным беларускім манументальна-дэкаратыўным мастацтве, прадстаўляе шырокай публіцы цікавыя працы вядомых мастакоў-манументалістаў і маладых аўтараў.
У Нацыянальнай бібліятэцы Беларусі – адна з палітраў творчасці беларускіх манументалістаў. У экспазіцыі – аўтары з адметным творчым почыркам і светабачаннем, знакамітыя класікі Каміль Камал, Сямён Дамарад, вядомыя беларускія мастакі Андрэй Скіцеў, Алесь Суша, Сяргей Крыштаповіч, Андрэй Кольга і іншыя.
Работы, выкананыя ў розных жанрах і матэрыялах, разам ствараюць уражанне грандыёзнага палатна. Распісанае мноствам сюжэтаў, яно становіцца маштабнай мазаікай сучаснага беларускага манументальнага мастацтва. Шматузроўнева, шматгранна “жывапісны роспіс” галерэі распавядае пра жыццё – яго мудрасць, лёгкасць, сэнс і прыгажосць.
Арганізатары – Нацыянальная бібліятэка Беларусі і Беларускі саюз мастакоў.
Выстаўка будзе працаваць да 21 лістапада 2021 года.
Дата яе заканчэння можа быць зменена.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.