Узноўлены шэдэўр

30 сакавіка ў музеі кнігі адбылося адкрыццё незвычайнай выставы “Узноўлены шэдэўр”. Упершыню будзе дэманстравацца ўнікальная гравіравальная дошка ХVII ст. і ўзноўленая з яе па даўняй тэхналогіі гравюра з партрэтам караля і вялікага князя Яна ІІІ Сабескага.

На вялікі жаль, гісторыя была бязлітаснай да беларускай культуры і да нашага часу не захавалася амаль ніводнай арыгінальнай дошкі, з якой нашы продкі рабілі цудоўныя гравюры ў XVI–XVIІI стст.

Дзякуючы вядомаму бібліяфілу, калекцыянеру гравюр і экслібрысаў Алегу Судлянкову беларусы атрымаюць магчымасць упершыню ўбачыць не толькі саму арыгінальную дошку, але і гравюру, узноўленую з яе па даўняй тэхналогіі.

Прадстаўленая на выставе медзяная дошка XVII ст. выканана ў тэхніцы разцовай гравюры. Гэта адна з найбольш старажытных тэхнік гравіравання на метале, у якой паглыбленыя элементы рысунка атрымліваюцца з дапамогай  вострага разца. На беларускіх землях за металагравюрай замацавалася назва медзярыт. На жаль, сучасныя беларускія майстры ўжо не працуюць у тэхніцы разцовай гравюры на метале. Аднак да нашых часоў захаваліся дасканалыя беларускія медзярыты, уключаныя ў склад старадрукаў XVII–XVIІI стст., найлепшыя з якіх будуць таксама прадстаўлены на выставе.

Тэхналогія і друк гравюры з рарытэтнай дошкі XVII ст. паўтораныя мастаком-графікам Віктарам Саўчанкам і прадстаўленыя на выставе ў фармаце відэафільма.

Дата яе завяршэння можа быць зменена.
Уваход на ўрачыстае адкрыццё вольны.

Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.