Дата правядзення
Час правядзення
Месца правядзення
З 8 снежня па 10 студзеня ў зале дакументаў міжнародных арганізацый Нацыянальнай бібліятэкі Беларусі (пам. 207g) адкрыта тэматычная кніжная выстава “Міжнародны валютны фонд: пабудова адзінай будучыні”, прысвечаная 75-годдзю стварэння Міжнароднага валютнага фонду.
Міжнародны валютны фонд (МВФ) – міжурадавая валютна-крэдытная арганізацыя, створаная ў мэтах развіцця міжнароднага фінансавага супрацоўніцтва і міжнароднай стабільнасці ў валютна-фінансавай сферы. МВФ імкнецца спрыяць міжнароднаму гандлю, высокай занятасці і ўстойліваму эканамічнаму росту, а таксама скарачэнню беднасці ва ўсім свеце. МВФ з’яўляецца спецыяльнай установай Арганізацыі Аб’яднаных Нацый, удзельнічае ў працы Эканамічнага і Сацыяльнага Савета ААН і мае ўласны статут, структуру кіравання і фінансы.
Ідэя стварэння МВФ зарадзілася на міжнароднай канферэнцыі ААН па валютна-фінансавых пытаннях, якая праводзілася ў Брэтан-Вудсе (штат Нью-Гэмпшыр, ЗША) у ліпені 1944 года. Дэлегаты ад 44 дзяржаў дамовіліся аб асновах эканамічнага супрацоўніцтва, закліканых не дапусціць паўтарэння згубнай эканамічнай палітыкі, якая стала адной з прычын Вялікай дэпрэсіі 1930-х гадоў. Прадстаўнікі краін-удзельніц распрацавалі статут (Артыкулы пагаднення), канчатковы варыянт якога першыя 29 дзяржаў падпісалі 27 снежня 1945 года. МВФ пачаў сваю дзейнасць 1 сакавіка 1947 года. Першай краінай, якая ўзяла крэдыт, была Францыя.
Сёння МВФ аб’ядноўвае 190 дзяржаў, а ў яго структурах працуюць 2 700 чалавек са 150 краін. Штаб-кватэра арганізацыі знаходзіцца ў Вашынгтоне (акруга Калумбія, ЗША).
Вышэйшы кіруючы орган МВФ – Савет кіраўнікоў, у якім кожная краіна-член прадстаўлена кіраўніком і яго намеснікам. Аператыўныя пытанні вырашае Выканаўчы савет фонду, які складаецца з 24 выканаўчых дырэктараў. Выканаўчы савет МВФ выбірае на пяцігадовы тэрмін дырэктара-распарадчыка, які ўзначальвае штат супрацоўнікаў Фонду. З 1 кастрычніка 2019 года гэты пост займае Крысталіна Георгіева.
У адпаведнасці з артыкулам 1 Артыкулаў пагаднення МВФ ставіць перад сабой наступныя мэты: спрыяць міжнароднаму супрацоўніцтву ў валютна-фінансавай сферы; садзейнічаць пашырэнню і збалансаванаму росту міжнароднага гандлю; забяспечваць стабільнасць валют; аказваць дапамогу ў стварэнні шматбаковай сістэмы разлікаў паміж дзяржавамі-членамі, а таксама ў ліквідацыі валютных абмежаванняў; прадастаўляць часова дзяржавам-членам сродкі ў замежнай валюце, якія давалі б ім магчымасць выпраўляць парушэнні раўнавагі ў іх плацежных балансах. З’яўляючыся адзінай міжнароднай установай, паўнамоцтвы якой прадугледжваюць вядзенне актыўнага дыялогу практычна з усімі краінамі па пытаннях эканамічнай палітыкі, МВФ служыць галоўным форумам для абмеркавання не толькі эканамічнай палітыкі краін у глабальным кантэксце, але і пытанняў, якія маюць вялікае значэнне для стабільнасці міжнароднай валютна-фінансавай сістэмы.
Рэспубліка Беларусь з’яўляецца членам МВФ з 1992 года. У гэтым жа годзе ў Мінску было адкрыта Прадстаўніцтва МВФ. МВФ садзейнічае Рэспубліцы Беларусь па трох вектарах: супрацоўніцтва з Нацыянальным банкам і ўрадам РБ па пытаннях праграм у сферы нацыянальнай эканомікі, з акцэнтам на падатковую, крэдытна-грашовую і гандлёвую палітыку; прадастаўленне рэсурсаў у выглядзе пазык і крэдытаў; экспертная і тэхнічная дапамога. Прадстаўнікі Рэспублікі Беларусь прымаюць рэгулярны ўдзел у розных мерапрыемствах Фонду, у тым ліку ў штогадовых пасяджэннях Савета кіраўнікоў МВФ.
На выставе прадстаўлена больш за 70 дакументаў на рускай і англійскай мовах: кнігі, брашуры, перыядычныя выданні, буклеты.
Экспазіцыя ўключае наступныя тэматычныя раздзелы:
- МВФ: гісторыя і сучаснасць
- Асноўныя напрамкі дзейнасці МВФ
- МВФ і Рэспубліка Беларусь
Выстава будзе карысная спецыялістам у галіне фінансаў і гандлю, прадпрымальнікам, даследчыкам у галіне малога і сярэдняга бізнесу, студэнтам і выкладчыкам эканамічных і фінансавых спецыяльнасцей.
Карысныя спасылкі
- Асноўныя звесткі аб МВФ
- Працэдура прыняцця рашэнняў у МВФ
- Артыкулы пагаднення Міжнароднага валютнага фонда (МВФ)
- Арганізацыйная структура
- Гадавыя справаздачы
- Прадстаўніцтва МВФ у Расійскай Федэрацыі
- Прадстаўніцтва МВФ у Рэспубліцы Беларусь
- Вэб-сайт МВФ
- Global Financial Stability Report (“Даклад аб глабальнай фінансавай стабільнасці”)
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 28.
Матэрыял пададзены аддзелам абслугоўвання афіцыйнымі дакументамі.