Дата правядзення
Час правядзення
Месца правядзення
26 лістапада ў бібліятэцы пачала работу выстаўка “Княства вобразаў і слоў”, прымеркаваная да 90-годдзя з дня нараджэння класіка беларускай літаратуры Уладзіміра Сямёнавіча Караткевіча.
Экспазіцыя падрыхтавана Нацыянальнай бібліятэкай Беларусі і Беларускім саюзам мастакоў.
Мастак Караткевіч, па словах сябра Рыгора Барадуліна, мог бы спаборнічаць з пісьменнікам Караткевічам – “некалькімі штрыхамі мог перадаць характар ці ўлюбёна-рамантычна ці здзекліва-гратэскава”. Мастаком слова створана больш за 600 выяў. У малюнках на гістарычную тэму ён дакладна выпісваў дэталі касцюма, зброі, сілуэты і характэрныя рысы герояў. Гэтыя выявы дапамагалі ў час працы над вобразнасцю тэкста.
Наведвальнікі атрымаюць унікальную магчымасць убачыць аўтарскія эскізы да аповесці “Дзікае паляванне караля Стаха”, рукапісы верша “Развітанне з Радзімай”, самаробны канверт і ліст да сябра Язэпа Хаўратовіча (з яго прыватнай калекцыі). Таксама ў экспазіцыю ўвайшлі юбілейныя, рэдкія і адметныя выданні твораў Уладзіміра Караткевіча з фондаў Нацыянальнай бібліятэкі Беларусі.
Прыхільнікі элітарнага напрамку кніжнага мастацтва “Livre d’artiste” (“Кніга мастака”) атрымаюць шчырую асалоду ад эксклюзіўных матэрыялаў да ствараемай вядомым кніжным графікам Паўлам Татарнікавым і каліграфам Віктарам Саўчанкам поўнасцю ўручную ў адзіным экзэмпляры “Паэмы пра явар і каліну”.
Гледачоў чакаюць арыгінальныя графічныя работы Арлена Кашкурэвіча, Міхаіла Басалыгі, Юрыя Якавенкі і інш. да сусветна вядомых раманаў і аповесцей, казак і вершаў Уладзіміра Караткевіча, такіх як: раман “Хрыстос прызямліўся ў Гародні”, аповесцей “Дзікае паляванне караля Стаха”, “Ладдзя роспачы” і іншых.
Вобразы, што даўно зрабіліся асабістымі яркімі ўспамінамі чытачоў, словы, якія сталі крылатымі выразамі, паўстануць на афортах, каляровых аўталітаграфіях і малюнках беларускіх мастакоў, будуючы “Княства вобразаў і слоў” – графічны помнік творчасці беларускага класіка.
Урачыстае адкрыццё выстаўкі “Княства вобразаў і слоў” пачнецца а 17-й гадзіне ў галерэі “Мабільная” (3-ці паверх).
На адкрыццё ўваход вольны, у іншы час – па чытацкім білеце або білеце сацыякультурнага цэнтра.
Выстаўка будзе працаваць да 1 красавіка 2021 г.
Дата яе заканчэння можа быць зменена.
Тэлефоны для даведак: (8 017) 293 28 81, 293 28 33.
E-mail: pr@nlb.by
Глядзіце таксама рэпартаж тэлеканала "СТБ".