Дата правядзення
Час правядзення
Месца правядзення
З 8 ліпеня па 3 лістапада ў зале нотных і аўдыявізуальных дакументаў (пам. 305) праходзіць юбілейная выстава “У песні я знайшоў сябе”, прысвечаная 80-годдзю кампазітара Давіда Фёдаравіча Тухманава.
Творчасць народнага артыста Расіі Давіда Тухманава добра знаёма жыхарам постсавецкай прасторы. “Как прекрасен этот мир”, “Эти глаза напротив”, “День Победы”, “Мой адрес – Советский Союз”, “Последняя электричка” сталі хітамі савецкай эстрады. Песні кампазітара папоўнілі рэпертуар такіх вядомых выканаўцаў як І. Кабзон, С. Ратару, В. Лявонцьеў, В. Абадзінскі, ансамблей “Весёлые ребята” і “Самоцветы”.
Для творчасці Д.Ф. Тухманава характэрны не толькі класічныя эстрадныя песні, але і наватарскія кампазіцыі. У сваіх творах ён выкарыстоўвае як багаты арсенал сродкаў эстраднай музыкі розных стыляў, у тым ліку рока, так і прыёмы сімфанічнай, камернай, інструментальнай музыкі.
Акрамя песень Д. Тухманаў працуе над дзіцячымі музычнымі праектамі, піша музыку да драматычных спектакляў, радыёпастановак і кінафільмаў. У апошнія гады Давід Фёдаравіч спрабуе сябе ў новых жанрах. Ім створаны цыклы балад і рамансаў на вершы І. Аненскага, Г. Тракля, А. Пушкіна, паэма для скрыпкі і аркестра “Святая ноч”, опера “Царыца”, араторыя “Легенда пра Ермака”.
На выставе прадстаўлены шматлікія нотныя зборнікі з песнямі Давіда Тухманава, песенныя цыклы для дзяцей “Бякі-букі”, “Знаёмыя насякомыя”, “Залатая горка” і інш.
Аўдыядакументы знаёмяць з альбомамі Давіда Тухманава “По волне моей памяти”, “НЛО”, “Как прекрасен мир”, “Ступени”, “Военные песни”, даюць магчымасць праслухаць песні кампазітара ў выкананні вядомых эстрадных спевакоў.
Дапаўняюць экспазіцыю артыкулы пра Д.Ф. Тухманава з кніг і перыядычных выданняў.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.