ГалоўнаяМерапрыемствыМінск – сталіца маёй краіны
Пявучыя струны душы
Майстар каменнага летапісу

Мінск – сталіца маёй краіны

Мінск – сталіца маёй краіны
Іншыя мерапрыемствы
6 жніўня – 9 кастрычніка
Дата правядзення
10.00–21.00
Час правядзення
2-гі паверх, кальцавы калідор
Месца правядзення

З 6 жніўня па 9 кастрычніка на 2-м паверсе кальцавога калідора размешчана выстаўка “Мінск – сталіца маёй краіны”, прымеркаваная да Дня горада, які адзначаецца ў другую суботу верасня.

Першыя звесткі пра горад Мінск выяўлены ў “Аповесці мінулых гадоў” і адносяцца да падзей 1067 года. Па ўказе вялікага князя літоўскага Аляксандра 14 сакавіка 1499 года Мінск, як і іншыя вялікія гарады, атрымаў Магдэбургскае права, а 12 студзеня 1591 года ў горада з’явіўся свой герб – на блакітным фоне выява Маці Божай паміж двума анёламі і херувімамі.

Раскрыць невядомыя старонкі жыцця Мінска, адчуць подых мінулых стагоддзяў і рытм сённяшняга часу дапаможа святочная выстаўка, у экспазіцыю якой уключана каля 50 тэматычных выданняў пра гісторыю і сучасны дзень сталіцы.

Выстаўка змяшчае навукова-папулярныя кнігі, фотаальбомы і каталогі, турыстычныя буклеты, брашуры, тэкставыя дакументы і фотаздымкі з краявідамі, гістарычнымі мясцінамі і помнікамі Мінска. Матэрыялы згрупаваныя па наступных тэматычных раздзелах: “Мінск гістарычны”, “Мінск сучасны”, “Мінск спартыўны”. Цэнтральную частку экспазіцыі займае раздзел “Мінск. Галоўная вуліца”, прысвечаны праспекту Незалежнасці. У ім сабраны кнігі пра адметны ансамбль горадабудаўнічага мастацтва: грамадскія будынкі, жылыя дамы і манументальныя помнікі, што вызначылі архітэктурна-мастацкі вобраз праспекта.

Сённяшні Мінск – сталіца суверэннай Рэспублікі Беларусь, сучасны еўрапейскі горад з развітай інфраструктурай. Ён уваходзіць у лік 273 найбуйнейшых гарадоў свету з насельніцтвам каля 2 млн чалавек і займае годнае месца сярод іх. Раздзел “Мінск сучасны”, як своеасаблівы навігатар, дапаможа зарыентавацца ва ўсёй разнастайнасці славутасцей беларускай сталіцы. Экспазіцыя ўключае выданне “Мінск. Спадчына сталіцы Беларусі” з QR-кодамі, якія праз мабільны тэлефон або планшэт дазваляюць дадаткова ўбачыць панарамны інтэр’ер будынкаў або іх від з вышыні птушынага палёту.

Сёлета сталіца Беларусі стала цэнтрам спартыўнай Еўропы. Мінск упершыню ў сваёй гісторыі прыняў спартыўны форум такога маштабу. Права прымаць II Еўрапейскія гульні ў сябе наша краіна заслужыла не толькі спартыўнымі поспехамі, якія дазволілі ёй быць на роўных з моцнымі дзяржавамі Еўропы, але і дзякуючы ўмелай арганізацыі розных сусветных і кантынентальных спаборніцтваў. У раздзеле “Мінск спартыўны” змяшчаецца інфармацыя аб найбольш буйных спартыўных аб'ектах Мінска і найбольш значных спаборніцтвах.

Экспазіцыя будзе цікавая шырокаму колу наведвальнікаў бібліятэкі: гісторыкам, культуролагам, кнігазнаўцам, а таксама тым, хто вывучае гісторыю і духоўную спадчыну Беларусі.


Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Тэлефон для даведак: (8 017) 293 29 80.

Матэрыял прадастаўлены аддзелам галерэйна-выставачнай дзейнасці.

Каментарыі карыстальнікаў:

Каментаванне даступна толькі зарэгістраваным карыстальнікам

Мерапрыемствы

Шырыня паэтычнага абсягу

20.02.2020

З 20 лютага па 19 сакавіка ў зале беларускай літаратуры (пам. 205) праходзіць выстаўка “Шырыня паэтычнага абсягу”, прысвечаная 85-годдзю з дня нараджэння народнага паэта Беларусі Рыгора Іванавіча Барадуліна (1935–2014).

Каштоўнасці і прыярытэты XXI стагоддзя: сацыяльная справядлівасць

19.02.2020

З 19 лютага па 17 сакавіка ў зале дакументаў міжнародных арганізацый (пам. 207g) адкрыта тэматычная выстаўка “Каштоўнасці і прыярытэты XXI стагоддзя: сацыяльная справядлівасць”, прысвечаная Сусветнаму дню сацыяльнай справядлівасці.

Крылы творчага натхнення

15.02.2020

З 15 лютага па 5 красавіка ў зале беларускай літаратуры (пам. 205) праходзіць выстаўка “Крылы творчага натхнення”, прымеркаваная да 95-годдзя з дня нараджэння народнага пісьменніка Беларусі Івана Якаўлевіча Навуменкі (1925–2006).

Размова з адвакатам аб захаванні інтарэсаў непаўналетніх пры разводзе і падзеле маёмасці

12.02.2020

Запрашаем карыстальнікаў на бясплатную тэматычную сустрэчу з адвакатам, арганізаваную ў рамках сумесных мерапрыемстваў Нацыянальнай бібліятэкі Беларусі і Беларускай рэспубліканскай калегіі адвакатаў.

Узгадавала зямля беларуская

07.02.2020

З 7 лютага па 29 сакавіка ў зале дакументаў па мастацтве (пам. 306) праходзіць кніжна-ілюстрацыйная выстаўка “Узгадавала зямля беларуская”, прысвечаная 210-годдзю з дня нараджэння вядомага мастака Івана Фаміча Хруцкага (1810–1885).



111